दस अर्बको हिसाब माग्दै पोखरामा नागरिक प्रदर्शन

पोखरा : पोखरामा कोभिड–१९ नेपाल, इनफ इज इनफ ग्रुपको आयोजनामा बिहीबार भएको प्रदर्शनमा सरकारले कोरोना भाइरस नियन्त्रण गर्न गरेका प्रयास असफल भएको बताएका छन् । सरकारले गरिरहेको आरडीडी परीक्षणको औचित्य नदेखिएको, लकडाउन चलिरहँदा सरकारको गति चित्त नबुझेको भन्दै सरकारलाई सही बाटोमा हिँड्न दवाब दिन पोखरेली युवाहरु सडकमा उत्रेका हुन् । 

पोखराको सहिदचोकमा (जिल्ला प्रशासन कार्यालय कास्कीको अगाडि) देखि राष्ट्रबैक चोकसम्म दोहोरो मानव साँग्लो  बनाएर युवा हातमा विभिन्न नारा लेखिएको ब्यानरसहित मौन विरोधमा उत्रेका हुन् । 

'हन्ड्रेड पर्सेन्ट पिसीआर, करेक्ट द क्वारेन्टिन पोलिसी', 'मिनिङलेस लकडाउन इज नट आन्सर', 'सरकार खै ? १० अर्बको हिसाब खै ?', 'कर केका लागि?' लगायतका नारा लेखिएका प्लेकार्ड लिएर युवा मौन जुलुसमा सहभागी भएका थिए । सरकार कोरोना नियन्त्रण गर्न सही बाटोमा हिंडोस् भनेर कार्यक्रमको आयोजना गरिएको आयोजक संस्थाकी स्वंसेबी मोनीका रानाभाटले बताइन् । 

फ्रन्टलाइनमा काम गर्ने, स्वास्थ्यकर्मी, सुरक्षाकर्मी, सफाई कर्मचारी लगायतका लागि पनि कोरोनाबाट सुरक्षित हुने गरी आवश्यक स्वास्थ्य सामाग्री उपलब्ध नभएको बिमल बरालले बताए । यसैले स्वस्फूर्त रुपमा १ हजारभन्दा बढी युवा सरकारलाई दवाब दिन भेला भएको अर्का स्वंसेवी अशोक खड्काले बताए । 

कार्यक्रमा सहभागी युवाको उपस्थितिले सरकारले आफ्ना गलत रबैया हटाएर सही मार्गमा नहिंडे युवा आन्दोलित हुने अवस्था देखाएको कार्यक्रममा सहभागीले बताएका छन् । शान्तिपूर्ण विरोध कार्यक्रममा केही युवाले अन्तिम समयमा सरकार विरोधी नाराबाजी गर्दा प्रहरीले हस्तक्षेप गरेको थियो ।