पर्वत : कोरोना संक्रमण देखिएका पर्वतका ८ जना निको भएर घर फर्किएका छन् । गत जेठ २० गते पहिलोपटक संक्रमण देखिएकाको बिहीबार दोस्रो रिपोर्ट नेगेटिभ आएपछि अस्पतालवाट डिस्चार्ज भएका हुन् ।
पर्वतको कोरोना अस्थायी अस्पतालको आइसोलेसनमा उपचाररत उनीहरुमध्ये फलेबास नगरपालिका –१० कुर्घाका २ जना, महाशिला गाउँपालिका –३ का ३ जना तथा फलेबास नगरपालिका –११ र फलेवासकै वडा नं. २ का १–१ जना छन् । त्यस्तै बिहादी गाउँपालिका वडा नं. –४ का १ जना रहेको पर्वत अस्पतालले जनाएको छ ।
प्रदेश जनस्वास्थ्य प्रयोगशालामा उनीहरुको दोस्रो पटक स्वाब परीक्षणका क्रममा रिपोर्ट नेगेटिभ आएपछि बिहीबार अबेर उनीहरुलाई स्थानीय तहको क्वारेन्टाइनमा पठाइएको जिल्ला अस्पताल पर्वतको प्रमुख डा. शिशिर देवकोटाले जानकारी दिए । उनीहरुसँगै संक्रमण देखिएका बिहादीका पुरुषमा भने दोस्रो पटक पनि रिपोर्ट पोजिटिभ आएको छ ।
बिहीबारै पर्वतमा थप ९ जनामा संक्रमण पुष्टि भएको थियो । योसँगै पर्वतमा संक्रमितको संख्या ३८ पुगेको छ । त्यसमध्ये ४ महिला र ३४ पुरुष छन् । बिहीबार ८ जना निको भएर फर्किएसँगै सक्रिय संक्रमितको संख्या ३० जना भएको स्वास्थ्य कार्यालय पर्वतका तथ्यांक अधिकृत एवं कोरोना रोकथाम जिल्लास्तरीय कमाण्ड फोर्सका सूचना अधिकारी प्रविण भण्डारीले बताए । उनका अनुसार संक्रमणमुक्त हुनेले कम्तीमा दुई सातासम्म आ–आफ्नो घरमा गएर होम क्वारेन्टाइनमा बस्नुपर्ने छ ।
उनीहरुलाई फलेवास नगरपालिकाका नगरप्रमुख पदमपाणी शर्मा, प्रमुख जिल्ला अधिकारी शम्भुप्रसाद रेग्मी, पर्वत अस्पतालका प्रमुख डा. शिशिर देवकोटाले बिदाइ गरेका हुन् । कार्यक्रममा फलेवासका नगरप्रमुख पदमपाणी शर्माले डिस्चार्ज भएकालाई घरमा गएपछि पनि कम्तिमा एक साता डाक्टरको सुझाव पालना गर्न आग्रह गरे । घरमा छोराछोरी, श्रीमती र वृद्धवृद्धा आमाबाबुको स्वास्थ्यलाई मनन गरेर आवश्यक सावधानी अपनाउन आग्रह गरे । उनले स्थानीय तहले विदेशबाट फर्किएका नागरिकलाई स्वदेशमै रोजगारी दिनका लागि विभिन्न कार्यक्रम ल्याउन लागेको समेत बताए ।
प्रमुख जिल्ला अधिकारी शम्भुप्रसाद रेग्मीले डाक्टरको निर्देशन र सुझाव पालना गर्न आग्रह गर्दै कुनै स्वास्थ्य समस्या आएमा तत्काल चिकित्सक वा जनप्रतिनिधिसँग सम्पर्क गर्न आग्रह गरे ।
यसैबीच कोरोना जितेका व्यक्तिले तातोपानी र जडिबुटी खाएर ठिक भएको बताएका छन् । कोरोना निको भएर घर जान लागेका फलेवास–१० का सेतु सुवेदीले कोरोना रोग त्यति ठूलो नभएको बताए । उनले यो ठूलो रोग नभइ आवश्यक सावधानी अपनाए ठिक हुने बताए । उनले तातोपानी, अदुवा, बेसार लगायत आर्युवेदिक औषधी खाएर कोरोना निको पारेको बताउँदै आफूलाई कुनै लक्षण नदेखिएको बताए ।
प्रतिक्रिया दिनुहोस !
