काठमाडौं : उपत्यकाका तीन जिल्ला प्रशासन कार्यालयले अत्यावश्यकबाहेक सेवा १५ दिन रोकेका छन् । यो निर्णय साउन २५ गतेदेखि भदौ ८ गतेसम्म लागू हुनेछ । काठमाडौं, ललितपुर र भक्तपुर तीनै जिल्ला प्रशासन कार्यालय र सरोकारवालासँगको छलफलपछि निर्णय गरिएको काठमाडौंका प्रमुख जिल्ला अधिकारी जनकराज दाहालले बताए ।
उनका अनुसार शान्ति सुरक्षासम्बन्धी सेवा, ठाडो निवेदन र उजुरीसम्बन्धी कार्य निरन्तर रहनेछ । अत्यावश्यक कामका लागि सवारी पास वितरण र विपत् व्यवस्थापनसम्बन्धी कार्य पनि गरिनेछ । कार्यालयमा अत्यधिक भीडभाड भएर जोखिम बढेकाले अत्यावश्यकबाहेक सेवा बन्द गर्ने निर्णय गरिएको उनले बताए । ‘कार्यालयमा एकदमै भीडभाड बढ्यो,’ उनले भने, ‘भीडले गर्दा हामी पनि एकदमै जोखिममा भएको महसुस ग¥र्यौं । त्यसैले अहिले उपत्यकाका तीनै प्रशासन कार्यालयको छलफल पछि यस्तो निर्णय गरिएको हो ।’
अत्यावश्यक कार्यका लागि आउँदा सेवाग्राहीले अनिवार्य मास्क लगाउनुपर्नेछ । स्यानिटाइजर प्रयोग गर्नुपर्नेछ । सरकारले तोकेको मापदण्ड पूरा गर्नुपर्ने भनिएको छ । मापदण्ड पूरा नगरी आए संक्रामक रोग ऐन, २०२० बमोजिम कारबाही हुने जनाइएको छ ।
उपत्यकाका प्रशासन कार्यालयले आफ्नो अधिकार प्रयोग गरी निर्णय लिएको गृह मन्त्रालयका प्रवक्ता सहसचिव चक्रबहादुर बुढाले बताए । ‘यो स्थानीय प्रशासनको निर्णय गर्ने अधिकार प्रयोग गरेर सेवा बन्द गर्नु भएको हो,’ उनले भने, ‘हामीले सबै कार्यालयको सेवा बन्द गर्ने निर्णयहरू गरेका छैनौं । अहिले जिल्ला प्रशासनले आफ्नो सेवा मात्रै बन्द गरेको हो ।’
बन्द भएका सेवा
नयाँ नागरिकता वितरण
नागरिकताको प्रतिलिपि वितरण
हातहतियार दर्ता र नवीकरण
संस्था दर्ता, पत्रपत्रिका दर्ता साथै नवीकरणसम्बन्धी कार्य
राहदानी वितरण
नाबालिग परिचयपत्र वितरण
अत्यावश्यक नभएका अन्य सेवा
निरन्तर रहने सेवा
शान्ति सुरक्षासम्बन्धी सेवा
ठाडो निवेदन र उजुरीसम्बन्धी सेवा
मुद्दासम्बन्धी कार्य
अत्यावश्यक कामको लागि सवारी पाससम्बन्धी कार्य
विपद् व्यवस्थापनसम्बन्धी कार्य
प्रतिक्रिया दिनुहोस !
