रुकुम : रुकुम पश्चिममा थप ४ जनामा कोरोना संक्रमण पुष्टि भएको छ । कर्णाली प्रदेश अस्पताल सुर्खेतको प्रयोगशालामा पीसीआर परीक्षण गर्दा आइतबार मुसिकोट नगरपालिका वडा नम्बर ७ का ३ जना पुरुष र १ महिलामा संक्रमन पुष्टि भएको हो ।
गत साउन ९ गत्ते मुसिकोट नगरपालिका र स्वास्थ्य सेवा कार्यालयबाट १ सय २४ जनाको स्वाब संकलन गरी परीक्षण गरिएकोमा चारजनामा संक्रमण देखिएको स्वास्थ्य सेवा कार्यालयका कोरोना रोग नियन्त्रण फोकल पर्सन ईश्वर रावलले जानकारी दिए । उनका अनुसार १ सय २० जनाको भने रिपोर्ट नगेटिभ आएको छ ।
यससँगै जिल्लामा कोरोना संक्रमितको संख्या ६४ पुगेको छ । थपिएका चार संक्रमितसहित अब जिल्लामा ३४ सक्रिय संक्रमित रहेका छन् । नयाँ संक्रमितहरुको कुनै ट्राभल हिस्ट्री नभएको पनि उनको भनाइ छ । पछिल्लो समय मुसिकोट नगरपालिकामा समुदायस्तरमा कोरोना संक्रमन फैलिरहेको छ ।
नयाँ संक्रमित चारैजनालाई आइसोलेसनमा राख्ने तयारी भइरहेको मुसिकोट नगरपालिकाले जनाएको छ । उनीहरूलाई वडा नम्बर १ सल्लेस्थित राप्ती समाज अस्पतालको आइसोलेसनमा राख्ने तयारी भइरहेको नगरपालिकाका निमित्त प्रमुख प्रशासकिय अधिकृत नरविर खड्काले जानकारी दिए ।
यसैबीच आइतबार जिल्ला अस्पतालको आइसोलेन बाट दुईजना संक्रमितलाई डिसचार्ज गरिएको छ । कोरोना संक्रमित भएर आइसोलेसनमा बसेको १४ दिन पुरा भएपछी वडा नम्बर ४ का १ पुरुष र वडा नम्बर १ की एक महिलालाई डिजचार्ज गरिएको स्वास्थ्य सेवा कार्यालयले जनाएको छ । यस सँगै जिल्लामा कुल संक्रमित मध्ये ३० जना उपचारपछि स्वस्थ भइसकेका छन् ।
प्रतिक्रिया दिनुहोस !
