पर्सामा १० दिनमा ५६८ ले जिते कोरोना : बिदा हुँदा स्वास्थ्यकर्मीसँग सेल्फी
भदौ १९, २०७७ शुक्रबार २२:३३:०
वीरगन्ज : पर्सामा संक्रमितको संख्या दैनिक थपिदै गए पनि केही दिन यता डिस्चार्ज हुनेको संख्या बढ्दै गएको छ। पर्सामा पछिल्लो १० दिन (भदौ ९ देखि १९ सम्म) मा मात्रै ५ सय ६८ जना संक्रमित डिस्चार्ज भएका छन्।
शुक्रबार मात्रै पर्सामा ५४ जना संक्रमित निको भएर घर फर्किएका छन्। शुक्रबार वीरगन्जस्थित बाटीका होटलको आइसोलेसनबाट २३ र सिद्धार्थ माविको आइसोलेसनबाट १५ जना डिस्चार्ज भएको जिल्ला प्रशासन कार्यालय पर्साले जनाएको छ।
यस्तै वीरगन्ज हेल्थ केयर अस्थायी कोभिड अस्पतालबाट १ पत्रकारसहित ८, गोपाल मण्डली अतिथी सदनको आइसोलेसनबाट ५ जना पनि शुक्रबार नै डिस्चार्ज भएको कार्यालयका प्रशासकीय अधिकृत विनय श्रीवास्तवले जानकारी दिए।
सँगै रानी पोखरी होटलको आइसोलेसन, गण्डक अस्थायी कोभिड अस्पताल र कलीकामाइ गाउँपालिकाको होम आइशोलेसनमा रहेका १ ÷१ जना पनि शुक्रबार नै कोरोना मुक्त भएको श्रीवास्तावले बताए।
यसअघि भदौ १८ गते ३६ , १७ गते एकै दिन १०९, १६ गते ४२, १५ गते २१, १४ गते ३७, १३ गते ६१, १२ गते ३९, ११ गते १०३ र भदौ १० गते ६६ जना कोरोना मुक्त भएका थिए।
श्रीवास्तवका अनुसार पर्सामा शुक्रबार साँझसम्म कोरोनाबाट निको हुनेको संख्या १ हजार ३ सय २७ पुगेको छ।
पर्सामा शुक्रबारसम्म २ हजार ३ सय ४४ जनामा सक्रमण पुष्टि भएको छ। ती मध्ये उपचारपछि १ हजार ३ सय २७ जना कोरोना मुक्त घर फर्किएको श्रीवास्तवले जानकारी दिए।
अब पर्साको १ सय ७० बेडको २ वटा कोभिड अस्पतालमा ८९ जना मात्रै संक्रमित उपचाररत छन्। यस्तै होम आइसोलेसनमा ९ सय ८ संक्रमित छन्।
जिल्लाका विभिन्न स्थानका विद्यालय, होटल र अतिथी सदनमा बनाइएका सेमी आइशोलेसनमा भने ३ सय २५ रहेको श्रीवास्तवले जानकारी दिए।
प्रतिक्रिया दिनुहोस !
