वीरगन्ज : पर्सामा थप १३ जनामा कोरोना भाइरसको संक्रमण पुष्टि भएको छ। वीरगन्ज स्थित नारायणी अस्पतालको प्रयोगशालामा सोमबार राति पर्सा, बारा र रौतहटका ५ सय ८० वटा स्वाबको नमूना परिक्षण गएिको थियो। तीमध्ये पर्साका १३ , बाराका ९ र रौतहटका ७ गरी २९ जनामा संक्रमण भेटिएको हो।
अस्पतालका प्रवक्ता डाक्टर अतुलेश चौरसीयाका अनुसार, सोमबार राति पर्सामा थपिएका १३ संक्रमितमध्ये वीरगन्ज स्थित नेपाली सेनाको चण्डीप्रसाद गणका १ सेना र तराई हस्पिटलका ३ जना छन्। यस्तै वीरगन्ज महानगरपालिका वडा नम्बर १०, १२, १३ र १६ का १-१ जना, सखुवा प्रसौनी गाउँपालिकाका ३ जना र कालीकामाई गाउँपालिकाका २ जनामा पनि संक्रमण भेटिएको चौरसीयाले जानकारी दिए।
योसँगै पर्सामा संक्रमितको संख्या २ हजार ४ सय १४ पुगेको जिल्ला प्रशासन कार्यालय पर्साले जनाएको छ। डाक्टर चौरसीयाका अनुसार नारायणी अस्पतालको प्रयोगशालामा सोमबार राति नै गरिएको परीक्षणमा बाराका ९ जनामा पनि संक्रमण पुष्टि भएको छ।
बाराको कलैया उपमहानगरपालिका वडा नम्बर ७ र १६ का १-१ जना, बारागढीका ४ जना, सुवर्ण गाँउपालिकाका १ जना र इलाका प्रहरी कार्यालय बारागढीका १ जना महागढीमाई नगरपालिका वडा नम्बर ४ का दुई जना पुरुषमा पनि कोरोना संक्रमण पुष्टि भएको हो। यस्तै रौतहटको गरुडा स्थित इलाका प्रहरी कार्यालयका ७ जना प्रहरीमा पनि सोमबार राति कोरोना संक्रमण पुष्टि भएको नारायणी अस्पतालका प्रवक्ता डाक्टर चौरसीयाले जानकारी दिए ।
प्रतिक्रिया दिनुहोस !
