बाजुराको हिमाली क्षेत्रमा भारी हिमपात, किसानलाई राहत
माघ २३, २०७७ शुक्रबार १८:३९:०
बाजुरा : मौसम बदली भएसँगै बाजुराको उच्च हिमाली क्षेत्रमा हिमपात सुरु भएको छ । तीन महिनाको खडेरीपछि हिउँ परेपछि हिउँदे बाली लगाएका किसान खुसी भएका छन् ।
हिउँदे बाली जौ, गहुँ, फलफूलमा पानीका लागि राहत मिलेको बुढीगंगा नगरपालिका–९ का कृषक कृष्ण सिंहले बताए । सिंचाई नभएको ठाउँमा हिउँ परेपछि लगाएको बाली सप्रिने आशा जागेको सिंहको भनाइ छ ।
बिहीबार रातिदेखि चिसो बढे पनि शुक्रबार बिहानदेखि बाजुरामा हिउँ पर्न सुरु भएको थियो ।
पहिलोपटक परेको हिउँले स्थानीयको जनजीवन भने केही प्रभावित बनाएको छ । चिसोले उच्च हिमाली क्षेत्रका स्थानीय घरबाहिर निस्कन सकेका छैनन्, वस्तुभाउ पनि गोठभित्र घाँस हालेर थुन्न बाध्य भएका छन् । यस्तै, बडिमालिका नगरपालिका र बुढीनन्दा नगरपालिकाको सिमाना पोरखे लेकमा हिउँ पर्दा बाजुरा जिल्लाको उत्तरी क्षेत्रका चारवटा स्थानीय तह जोड्ने मार्तडी–कोल्टी सडक अवरुद्ध भएको छ ।
सडक अवरुद्ध भएपछि उत्तरी क्षेत्रका चार तह र कर्णालीका हुम्ला, कालिकोट र मुगुका स्थानीयलाई आवतजावतमा समस्या भएको छ । यस क्षेत्रका बिरामीलाई जिल्ला अस्पतालसम्म लैजान र बाहिर जिल्ला उपचार गराउन पनि समस्या भएको बालिका यातायात प्रालिका कर्मचारी चक्र बडुवालले जानकारी दिए । 
प्रतिक्रिया दिनुहोस !
