ताप्लेजुङ: आफैँले जन्माएको नवजात शिशुको हत्या गरेको अभियोगमा आइतबार दुई महिला पक्राउ परेका छन् ।
पक्राउ पर्नेमा मेरिङ्देन गाउँपालिका–२ सान्थाक्राकी २२ वर्षीया स्याङ्मु शेर्पा र फक्ताङलुङ गाउँपालिका–२ खेजेनिमकी ३७ वर्षीया लाक्पा दिकी शेर्पा छन् ।
दुवैलाई अवैध रुपमा बच्चा जन्माएर मारेको अभियोग छ । स्याङ्मुले गत माघ २२ गते नवजात शिशु जन्माएर हत्या गरेको प्रारम्भिक बयानमा स्विकारेको जिल्ला प्रहरी कार्यालय ताप्लेजुङका प्रहरी निरीक्षक मोहन पोख्रेलले बताए । स्थानीयले नवजात शिशुको शव गत माघ ३० गते अलैची बगानभित्र देखेपछि प्रहरीलाई खबर गरेका थिए । शवको जिल्ला अस्पतालमा पोष्टमार्टमपछि गाउँपालिकाले अन्त्यष्टि गरेको थियो ।
उता खेजिनिमको गुम्बाडाँडा छेउमा अम्रिसो रोपिएको पाखामा शनिबार दिउँसो स्थानीयले नवजात शिशुको शव देखेपछि प्रहरीललाई खबर गरेका थिए । शव भेटिएको खबर पाएपछि घटनास्थलमा पुगेको प्रहरीले अनुसन्धानका क्रममा सोही गाउँकी लाक्पा दिकीलाई पक्राउ गरेको थियो ।
शवको प्रारम्भिक अनुसन्धानपछि जिल्ला अस्पताल ताप्लेजुङमा पोष्टमार्टम भइरहेको छ । लाक्पा दिकीले आफ्नो अवैध रुपमा रहन गएको गर्भबाट गत माघ ७ गते नवजात शिशु जन्मिएको हुनाले हत्या गरेर फालेको प्रारम्भिक बयानमा बताएको पोख्रेलले जानकारी दिए । दुवैलाई जिल्ला अदालतबाट आइतबारै ५ दिनको म्याद थप गरी थप अनुसन्धान भइरहेको प्रहरीले जनाएको छ ।
प्रतिक्रिया दिनुहोस !
