जोमसोम : दुर्गम जिल्लाको रुपमा परिचित उपल्लो मुस्ताङमा शनिबारदेखि फोरजी सेवा सञ्चालनमा आएको छ । नेपाल टेलिकमले उपल्लो मुस्ताङको लोमान्थाङ र स्याङवचेमा चौथो पुस्ताको फोरजी सेवा जडान गरेको जनाएको छ ।
२०७३ सालबाट काठमाडौं उपत्यकामा सुरु गरिएको फोरजी सेवा धौलागिरिका तीन जिल्ला पर्वत,बाग्लुङ र म्याग्दीमा विस्तार भएको थियो । पछिल्लो समय नेपाल टेलिकमले मुस्ताङको जोमसोम र मुक्तिनाथक्षेत्रमा विस्तार गरिएको फोरजी सेवा शनिबार उपल्लो मुस्ताङसम्म पुर्याइएको नेपाल टेलिकम बाग्लुङका कार्यालय प्रमुख वरिष्ठ इन्जिनियर केशव शर्माले जानकारी दिए ।
उनका अनुसार टेलिकमका प्राविधिकले उपल्लो मुस्ताङमा फोरजी जडान गरेका हुन् । मोबाइल डाटामार्फत अत्याधुनिक प्रविधिको उच्च गतिको इन्टरनेट चलाउन फोरजी सेवा सञ्चालनमा ल्याइएको इन्जिनियर शर्माले उल्लेख गरे । निकट भविष्यमै मुस्ताङका ५ वटै स्थानीय तहमा फोरजी विस्तार गरिने वरिष्ठ इन्जिनियर शर्माको भनाइ छ ।
नेपाल टेलिकमले मुस्ताङका अन्य स्थानमा पनि क्रमशः फोरजी सेवा सञ्चालनमा ल्याउने जनाएको छ ।उपल्लो मुस्ताङमा फोरजी सेवा सञ्चालनमा आएसँगै टेलिकमका सेवाग्राहीले उच्च गतिको इन्टरनेट सेवा उपयोग गर्न पाउने भएका हुन् ।
यसअघि उपल्लो मुस्ताङमा थ्रीजी सेवा सञ्चालनमा ल्याइएको थियो । फोरजी मोबाइल ब्रोडब्याण्ड(उच्चगतीको ईन्टरनेटसहितको मोबाइल) सेवा हो ।यसको क्षमता थ्र्रीजी भन्दा क्षमतायुक्त र तीब्र गतीको इन्टरनेट मानिन्छ । यसको गती प्रतिसेकेन्ड एकसय मेगाबिट्स (एमबिपिएस) भन्दा माथि हुन्छ । ग्राहकले गुणस्तरयुक्त फोर जी सेवाका लागि खर्च भने केही बढी गर्नुपर्नेछ ।
उच्च गतिको इन्टरनेट हुने भएकाले फोरजी प्रयोगकर्ताले अहिलेभन्दा सजिलो गरी भिडियो कल र च्याट गर्न सक्नेछन् । फोर जी प्रविधिले मोबाइलमै थ्रिडी भिडियोसमेत हेर्ने सुविधा दिने बताइन्छ । फोर जी सेवाले ‘डिजिटल नेपाल’को लक्ष्यलाई पनि सघाउने गर्छ । विशेषगरी भौगोलिक जटिलताका कारण सबै ठाउँमा फाइबर पुर्याउन कठिन पर्ने भएकाले टेलिकमले ग्रामीण क्षेत्रमा ब्रोडब्याण्ड (ताररहित) इन्टरनेट चलाउन फोर जी विस्तार गरेको जनाएको छ ।
फोर जी राउटरबाट कम्युटरलगायतका अन्य उपकरणमा पनि इन्टरनेट सञ्चालन गर्न सकिनेछ । ग्रामीण भेगमा ८०० मेगाहर्जमा फोरजी चल्ने हुँदा सिग्नल कभरेज (पहुँच) पनि बढी ठाउँमा पुग्ने टेलिकमले जनाएको छ ।मोबाइलमार्फत फोरजी सेवा एक्टिभ गर्न स्टार फोरफोरफोर ह्यास डायल गरी प्राप्त निदेशन अनुसार सीम परीक्षण गरी उपयोग गर्न सकिन्छ । फोरजी एक्टिभ भएपछि मोबाइलमा नोटिकेफसन सूचना आउँछ ।
प्रतिक्रिया दिनुहोस !
