भक्तपुर : भक्तपुरमा गएको ३ दिनदेखि कोरोना भाइरस संक्रमणको कारण हुने मृत्यु स्थिर रहेको छ । स्वास्थ्य कार्यालय भक्तपुरका अनुसार यहाँ जेठ २५ देखि २७ गतेसम्म कोरोना भाइरसको कारण कुनै पनि संक्रमितको ज्यान गएन ।
जेठ २४ गते भने ३ जना संक्रमित पुरुषको मृत्यु भएको थियो । त्यसदिनदेखि २७ गतेसम्म कुनै पनि संक्रमितको मृत्यु नभएको कार्यालय प्रमुख कृष्ण मिजारले जानकारी दिए ।
भक्तपुरमा कोरोना भाइरस संक्रमणको कारण २७६ जनाको मृत्यु भइसकेको छ । जसमा १७९ जना पुरुष र ९७ जना महिला रहेका छन् । स्वास्थ्य कार्यालयको तथ्यांकअनुसार भक्तपुरका ४ नपामध्ये सबैभन्दा बढी मध्यपुर थिमिका ६३ जना पुरुष र २८ जना महिला गरी ९१ जनाले कोरोना भाइरस संक्रमणका कारण ज्यान गुमाएका छन् ।
भक्तपुर र सूर्यविनायक नपाका समान ७४ जना संक्रमितको मृत्यु भएको छ । भक्तपुरका ४४ पुरुष र ३० महिलाले ज्यान गुमाउँदा सूर्यविनायकका ४६ पुरुष र २८ महिलाको मृत्यु भएको छ । त्यस्तै चाँगुनारायण नपाका २६ जना पुरुष र ११ जना महिला गरी ३७ जना संक्रमितको मृत्यु भएको स्वास्थ्य कार्यालयले जनाएको छ ।
८२ जना थपिँदा ८४ जना संक्रमित डिस्चार्ज
पछिल्लो समय भक्तपुरमा कोरोना भाइरस संक्रमणलाई जित्नेहरुको संख्या बढेको छ । केही हप्तासम्म करिब ८० प्रतिशतको हाराहारीमा रहेको डिस्चार्ज हुनेहरुको संख्या बुधबारसम्म १३ प्रतिशत बढेर ९३ प्रतिशत पुगेको छ ।
गएको २४ घन्टामा पनि नयाँ थपिने भन्दा डिस्चार्ज हुने संक्रमितहरु बढी थिए । ‘बिहीबार ८२ जनामा संक्रमण पुष्टि हुँदा ८४ जना भने डिस्चार्ज भए’, स्वास्थ्य कार्यालय प्रमुख मिजारले भने, ‘संक्रमणदर घट्दा डिस्चार्ज हुने दरमा निरन्तर वृद्धि भएको छ ।’
भक्तपुरमा हालसम्म २० हजार ९७४ जनामा संक्रमण पुष्टि भएको छ । जसमा पुरुष ११ हजार ४७३ र महिला ९ हजार ५०१ जना रहेका छन् । यसमध्ये १० हजार ७१८ जना पुरुष र ८ हजार ८३६ जना महिला गरी १९ हजार ५५४ जना डिस्चार्ज भएका छन् ।
सक्रिय संक्रमित एक हजार १४४
भक्तपुरमा अझै ५७६ जना पुरुष र ५६८ जना महिला गरी एकहजार १४४ जना सक्रिय संक्रमित रहेका छन् । सक्रिय संक्रमितमध्ये सूर्यविनायक नपामा १९९ जना पुरुष र १८३ जना महिला गरी ३८२ जना रहेका छन् ।
मध्यपुर थिमि नपामा १६५ जना महिला र १४५ जना पुरुष गरी ३१० जना, भक्तपुर नपामा १०७ जना महिला र १०७ जना नै महिला गरी २१४ जना तथा चाँगुनारायण नपामा ९२ जना पुरुष र ७५ जना महिला गरी १६७ जना सक्रिय संक्रमित रहेका छन् ।
सक्रिय संक्रमितमध्ये ९२.८३ प्रतिशत अर्थात ५३२ जना पुरुष र ५३० जना महिला गरी एकहजार ६२ जना होम आइसोलेसनमा रहेको स्वास्थ्य प्रमुख मिजारले जानकारी दिए ।
उनका अनसार ७.१७ प्रतिशत अर्थात ४४ जना पुरुष र ३८ महिला गरी ८४ जना अस्पताल तथा नपाको आइसोलेसनमा रहेका छन् ।प्रमुख मिजारले भक्तपुर नपाका २५, मध्यपुर थिमि नपाका २४, सूर्यविनायक नपाका १९ र चाँगुनारायण नपाका १४ जना सक्रिय संक्रमित अस्पताल तथा नपाको आइसोलेसनमा रहेका छन् ।
प्रतिक्रिया दिनुहोस !
