कर्णाली डुंगा दुर्घटना अपडेट : आमा छोरासहित तीनजना वेपत्ता, दुई घाइते, खोजी जारी
साउन १७, २०७८ आइतबार १५:१:०
धनगढी : कैलाली र सुर्खेतको सीमाना भएर बग्ने कर्णाली नदीमा आइतबार दिउँसो १२ बजेतिर डुंगा पल्टिदा तीनजना बेपत्ता भएका छन भने दुईजना घाइते भएका छन् । इलाका प्रहरी कार्यालय चिसापानीले दिएको जानकारी अनुसार कैलालीको मोहन्याल गाउँपालिका ३ बाट बच्चालाई खोप लगाउनका लागि सुर्खेतको चौकुने गाउँपालिका अन्तर्गतको बिजौरा भन्ने स्थानमा जान लागेकाहरु सवार डुंगा कर्णालीमा पल्टिएको हो ।
इलाका प्रहरी कार्यालय चिसापानीका प्रहरी निरिक्षक पुस्करराज पन्तका अनुसार कैलालीको मोहन्याल गाउँपालिका ३ की २० वर्षीया उर्मिला सलामी मगर, उनका १० दिनका नवजात शिशु र सोही वडाकी २० वर्षीया पार्वती थापा बेपत्ता छन् ।
डुंगा पल्टिएपछि कैलाली मोहन्याल गाउँपालिका ३ बस्ने १९ वर्षीया धनसरा सलामी मगर र उनका १ महिनाका छोरा कर्ण सलामी मगर घाइते छन्। बच्चाको अवस्था सामान्य रहेपनि धनसराको अवस्था गम्भीर रहेको प्रहरीले जनाएको छ ।
शनिबार रातिदेखि परेको अविरल वर्षापछि कर्णाली नदीमा पानीको बहाव बढेको थियो । पानीको तीब्र बेगका कारण काठको डुंगा पल्टिएको प्रहरीले जनाएको छ । कर्णालीमा प्रहरी र स्थानीयले बेपत्ताको खोजी गरिरहेको जिल्ला प्रहरी कार्यालय कैलालीले जनाएको छ ।
मोहन्याल ३ का नागरिक स्वास्थ्य उपचार, बालबालिकाको खोपका लागि सुर्खेत जाने गर्छन् । कैलालीको लम्की टिकापुर आउनु भन्दा उनीहरुलाई कर्णाली तरेपछि सुर्खेत नजिक पर्छ ।
प्रतिक्रिया दिनुहोस !
