साना: यमनको दक्षिणी प्रान्तमा हुथी आक्रमणमा परी ३० सैनिक मारिएका छन् भने ६० जना गम्भीर घाइते भएका छन् । अल अनाद मिलिट्री बेसमा आइतबार हुथी विद्रोहीले आक्रमण गरेका थिए ।
दक्षिण प्रान्तका प्रवक्ता मोहम्मद अल नकिबका अनुसार दक्षिण यमनको लाहिज प्रान्तमा हुथी विद्रोहीहरुले सैन्य ड्रोनमार्फत मिसाइल आक्रमण गरेका थिए । विष्फोटक मिसाइल आइतबार बिहान आर्मीको तालिम क्षेत्रमा खसेको थियो ।
बिहानी अभ्यास गरिरहेको समयमा सेनामाथि हमला भएको स्थानीय मिडियाले जनाएका छन् । घटनापछि उद्धारकर्मीहरु घटनास्थलमा पुगेका छन् । मृतक र घाइतेको संख्या अझै बढ्न सक्ने बताइएको छ।
हुथी विद्रोहीले यमनको राजधानी एवं यमनको सबैभन्दा ठूलो शहर साना कब्जा गरेसँगै सन् २०१४ मा युद्ध समाप्तीको घोषणा गरिएको थियो । सन २०१४ सम्ममा यमनको दोस्रो ठूलो शहर आदेनमा अमेरिकाले अल कायदाविरुद्ध ड्रोन आक्रमण गरेको थियो । सन् १९९० मा दक्षिण यमनबाट हुथी विद्रोहीको उदय भएको हो ।
प्रतिक्रिया दिनुहोस !
