प्योङयाङ: उत्तर कोरियाले ३० लाखभन्दा बढी चिनियाँ खोप लिन अस्वीकार गरेको छ । युनिसेफकाअनुसार उत्तर कोरियाले उक्त खोप अन्यत्र प्रदान गर्न भन्दै खोप लिन अस्वीकार गरेको हो ।
‘कोभिड १९ अन्तर्राष्ट्रिय खोप वितरण कार्यक्रम कोभ्याक्समार्फत चीनमा बनेको करिब ३० लाख डोज सिनोभ्याक उत्तर कोरियालाई उपलब्ध गराउन खोजिएको थियो । तर उत्तर कोरियाले आफूलाई नभई गरिब मुलुक र अति प्रभावित क्षेत्रमा वितरण गर्न भन्दै सो खोप अस्वीकार गरेको छ’ युनिसेफका एक प्रवक्ताले इमेलमार्फत भनेका छन् ।
यसअघि कोभ्यास कार्यक्रमअन्तर्गत उत्तर कोरियामा चिनियाँ खोप पठाउन सकिने बताइएको थियो । करिब १ महिनापछि जवाफ फर्काउँदै उत्तर कोरियाले आफूले कोभिड खोप नलिने बताएको छ ।
यसअघि जुलाईमा रुसले उपलब्ध गराउने भनेको कोभिड १९ विरुद्धको एस्ट्राजेनेका खोप पनि उत्तर कोरियाले अस्वीकार गरेको थियो । त्यसबेला रुसले वितरण गरेको खोपमा असर देखिएको भन्दै उत्तर कोरियाले उक्त खोप अस्वीकार गरेको थियो ।
दक्षिण अफ्रिकी थिंक ट्यांक इन्स्टिच्युट फर नेसनल सेक्युरिटी स्ट्राटेजी–आइएनएसएस)को एक रिपोर्टअनुसार चिनियाँ खोपको प्रभावकारीतामाथि उत्तर कोरियाले शंका गरे पनि रुसले बनाएको खोप प्रयोग गर्न भने इच्छुक थियो । अगष्ट १९ सम्ममा उत्तर कोरियामा कोभिड संक्रमण नभेटिएको विश्व स्वास्थ्य संगठनले जनाएको छ । उत्तर कोरियाले कोभिड नियन्त्रणलाई ध्यानमा राख्दै गत जनवरीदेखि अन्तर्राष्ट्रिय सीमा बन्द गराएको छ ।
प्रतिक्रिया दिनुहोस !
