निर्दयी बावुआमा : छोराको हत्यापछि आफै होहल्ला गर्दै हिँडेका थिए
भदौ ३०, २०७८ बुधबार १६:५०:०
भैरहवा: रुपन्देहीको गैडहवा गाउँपालिका- ६ मा आफ्नै ८ महिने शिशुको हत्याको आरोपमा बुवा र आमा पक्राउ परेका छन् । हत्याको आरोपमा बुवा श्रीराम मल्लाह र आमा रेनु मल्लाहलाई प्रहरीले पक्राउ गरेको हो ।
पक्राउ परेका श्रीरामको बुवा चौथी मल्लाह वर्षौदेखि परिवारको सम्पर्कमा छैनन् । आमा भानुमती मल्लाह परिवारसँग बस्दै आएकी छिन् । भानुमतीको तीन छोरी जेठी अकालमती, माइली लिली र कान्छी लक्ष्मी र एक छोरा श्रीराम हुन् ।
भानुमतीको नागरिकता थिएन । जसअनुसार उनको छोरा-छोरीको पनि नागरिकता बनेन् । भानुमतिको सन्तान भएता पनि ०६३ सालमा अविवाहितको रुपमा उनले नागरिकता बनाइन् । जेठी छोरी अकालमतीको लुम्बिनी सांस्कृतिक नगरपालिका २ मा विवाह भयो ।
श्रीमानको तर्फबाट उनको नागरिकता बन्यो । माइली छोरी लिलीको भारतमा विवाह भयो र उनी उतै गइन् । घरमा कान्छी छोरी लक्ष्मी र छोरा श्रीराम थिए । श्रीरामको रेनुसँग विवाह भयो । परिवारको सम्पत्ती त्यही बसोबास गरिरहेको एक तले घरसहित ११ धुर जग्गा थियो । र, यही जग्गाका कारण परिवारमा दैनिक झैझगडा हुने गरेको थियो ।
‘त्यही जग्गाको विवादका कारण शिशुको हत्या हुन पुगेको प्रारम्भिक अनुसन्धानबाट देखिन्छ’ रुपन्देहीका डिएसपी सत्य नारायण थापाले भने, ‘विभिन्न कोणबाट घटनाको अनुसन्धान भइरहेको छ र विस्तृत अनुसन्धानपछि सबै विषय स्पष्ट हुन्छ ।’
प्रहरीका अनुसार दुई छोरीको विवाह भइसकेको र घरमा रहेको कान्छी छोरीको पनि विवाह भएर गएपछि आमा भनुमतीको नाममा रहेको उक्त जग्गा आफ्नो छोरा सुरजको नाममा हुने घटनाका आरोपीहरु विश्वस्त थिए । तर, घटनाको अघिल्लो दिन आमा भानुमतीले उक्त जग्गा जेठी छोरी अकालमतीको नाममा राजीनामा पास गरिदिइन् ।
जग्गा अकालमती नाममा पास भएको जानकारी पाएपछि आरोपीहरुले अब आफूहरुको केही नहुने भन्ने मनसाय बनाएर आफ्नो र शिशुको सामूहिक मृत्युको योजना बनाए । प्रहरीका अनुसार श्रीराम र रेनुले शिशुलाई घरको छतमा लगे ।
रातिको १ बजेको समय थियो । नौ महिना कोखमा राखेर जन्माएकी आमाले नै घाँटी रेटेर आफ्नो हत्या होला भन्ने कुरा ती दूधे बालकले थाहा पाउने कुरै भएन। छतमा पुगेपछि आमाले शिशुलाई काखमा राखेर नछट्पटियोस् भन्दै खुट्टा समातिन् र बुवाले हसियाँ समाएर घाँटी रेट्न सुरु गरे । घाँटी रेट्दा ती दूधे बालक रोए, तड्पिरहे, कराए तर क्रुरताको सीमा नाघेका ती बुवा आमाको मन पग्लिएन । अन्ततः फक्रिन नपाउँदै आफ्नै शिशुलाई उनीहरुले कोपिलामै नै निमोठिदिए । घाँटी रेट्दा दयामायाको सवालमा उनीहरु अहिले नजवाफमा छन् ।
‘विभत्स तरिकाले मार्ने भन्दै योजना बनाएर छतमा गएका उनीहरु शिशुको हत्या गरेपछि आफ्नो मृत्युप्रतिको मनोदशा बदलिएको देखिन्छ,' डीएसपी थापाले भने, ‘त्यसपछि शिशुलाई पोको पारेर कोठामा ल्याएर राखे र आफ्नो छोराको हत्या भएको भन्दै अ गरे ।’
होहल्लापछि प्रहरी घटनास्थलमा पुग्यो । घटनाको अनुसन्धानको प्रहरीले शिशुको बुवा र आमालाई नियन्त्रणमा लियो । अनुसन्धानमा शिशुको बुवा र आमाले हत्या गरेको स्वीकार गरेको डिएसपी थापाले बताए ।
अहिले उनीहरुको इलाका प्रहरी कार्यालय लुम्बिनीको थुनामा छन् । दुवैजनाविरुद्ध कर्तव्य ज्यान मुद्दामा जिल्ला अदालत रुपन्देहीबाट पाँच दिनको म्याद लिएर घटनाको थप अनुसन्धान भइरहेको जिल्ला प्रहरी कार्यालय रुपन्देहीले जनाएको छ ।
प्रतिक्रिया दिनुहोस !
