ढल्केवर(धनुषा) : धनुषामा रुखमा मोटरसाइकल ठोकिएर दुर्घटना हुँदा दुईजनाको मृत्यु भएको छ। दुर्घटनामा अर्का एकजना गम्भीर घाइते भएका छन् । शनिबार तीनजना सवार बा.४८ प २२५५ नम्बरको मोटरसाइकल गणेशमान चारनाथ नगरपालिका–२ सुरीस्थित भित्री सडकमा अनियन्त्रित भइ रुखमा ठोकिएर दुर्घटना भएको जिल्ला ट्राफिक प्रहरी कार्यालय धनुषाले जनाएको छ ।
दुर्घटनामा परेर गणेशमान चारनाथ नगरपालिका-१ छघरियाका २१ वर्षीय दीपलाल महरा र गणेशमाण चारनाथ नगरपालिका-२ गंगापुरका २० वर्षीय हरिचन पासवानको मृत्यु भएको जिल्ला ट्राफिक प्रहरी कार्यालय धनुषाका इन्सपेक्टर नवराज न्योपानेले जानकारी दिए ।
उनका अनुसार दुर्घटनामा मोटरसाइकलमा सवार गणेशमाण चारनाथ नगरपालिका–२ गंगापुरका २२ वर्षीय लालबाबु पासवान गम्भीर घाइते भएका छन् । उनको जनकपुरस्थित जानकी हेल्थ केयरको सघन कक्षमा उपचार भइरहेको धनुषा ट्राफिक प्रहरीले जनाएको छ । प्रहरीका अनुसार गम्भीर घाइते लालबाबु मृतक हरिचनका दाइ हुन् ।
तीव्र गतिमा रहेको मोटरसाइकल अनियन्त्रित भइ रुखमा ठोकिएर दुर्घटना भएको प्रहरीले जनाएको छ ।
प्रतिक्रिया दिनुहोस !
