बेनी : नेकपा एमाले म्याग्दीको आइतबार बेनीमा सम्पन्न नवाैं जिल्ला अधिबेशनबाट देबेन्द्रबहादुर कटुवालको अध्यक्षतामा सर्वसम्मत जिल्ला कमिटी चयन गरिएको छ ।
उपाध्यक्षमा बालकृष्ण सुबेदी, सचिवमा सुरत केसी, उपसचिवमा थमसरा पुन र राजकुमार थापा चयन भएको एमालेका केन्द्रीय सदस्य तथा जिल्ला इञ्चार्ज भूपेन्द्रबहादुर थापाले जानकारी दिए ।
अध्यक्ष कटुवाल र उपाध्यक्ष सुबेदी आठौ अधिबेशनबाट चयन भएको जिल्ला कमिटीको उपाध्यक्ष र सचिव थिए । सचिव केसी, उपसचिव पुन र थापाद्धय यसअघिको कार्यकालको जिल्ला कमिटीको सचिवालय सदस्य थिए ।
जिल्ला समन्वय समितिका प्रमुख रहेका केसी बिस. २०५४ को स्थानीय चुनावमा तत्कालीन भगवति गाविसको अध्यक्षमा निर्वाचित भएका थिए । स्थायी शिक्षकको जागिर छाडेर राजनीतिमा लाग्नुभएका केसी रघुगंगा गाउँपालिका–२ भगवतिका हुन् ।
शिक्षण पेशाबाट राजनीतिमा आएका रघुगंगा गाउँपालिका–३ का सचिब सुबेदीले शिक्षक, युवा संगठन हुदै पार्टी राजनीतिमा आएका थिए । धवलागिरी गाउँपालिकाको जननिर्वाचित अध्यक्ष पुन अनेमसंघ क्रान्तिकारीको केन्द्रीय सदस्य र जिल्ला अध्यक्ष हुन् ।
‘साधारण सदस्य संख्याको आधारमा कलस्टर बाँडेर पालिका कमिटीलाई जिल्ला कमिटीका सदस्य चयन गर्ने जिम्मेवारी दिएका थियौ,’ इञ्चार्ज थापाले भने ‘पालिका कमिटीको सिफारिसको आधारमा जिल्ला सदस्यहरु पनि सर्वसम्मत चयन भएको छ ।’
शुक्रबारदेखि सुरु भएको अधिवेशनमा अध्यक्षमा केसी र सुबेदीले दाबी गरेका थिए । स्थायी कमिटी सदस्य थममाया थापाको नेतृत्वमा रहेको ९ सदस्यीय अध्यक्ष मण्डलले पदाधीकारीका आकाक्षीहरुबीच सहमति जुटाएको हो ।
भेग र क्षेत्रीय प्रतिनिधित्वको सन्तुलन मिलाउन पालिकालाई सदस्य छान्ने अधिकार दिएको निवर्तमान अध्यक्ष हरिकृष्ण श्रेष्ठले बताए । शनिबार भएको बन्दसत्रमा जिल्ला अध्यक्ष श्रेष्ठले प्रस्तुत गरेको सांगठनिक र राजनीति तथा आर्थिक विभाग प्रमुख प्रमोद श्रेष्ठले प्रस्तुत गरेको आर्थिक प्रतिवेदन पारित भएको थियो ।
विभिन्न आठ वटा समूह बनाएर छलफल गरि सुझाव पेश गरेका थिए । समूहगत छलफलका टोली नेताहरुले सहमतिमा नेतृत्व चयन गर्न र आगामी चुनाव जित्ने गरी तयारी थाल्न नेतृत्वलाई सुझाव दिएका थिए । जिल्ला समन्वय समितिको सभाहलमा भएको अधिवेशनमा ५१० जना प्रतिनिधी सहभागी थिए । ९० सदस्यीय जिल्ला कमिटीमा २८ जना महिला चुनिएका छन् ।
प्रतिक्रिया दिनुहोस !
