अतिरिक्त शुल्कविरुद्ध नोबेल परिसरमा टायर बालेर विद्यार्थीको प्रदर्शन

विराटनगर : विराटनगरस्थित नोबेल मेडिकल कलेजमा अतिरिक्त शुल्कविरुद्ध आन्दोलनरत विद्यार्थीहरूले टायर बालेर प्रर्दशन गरेका छन् । विभिन्न विद्यार्थी संगठनले नोबेल मेडिकल कलेज अगाडि टायर बालेर प्रदर्शन गरेका हुन् ।  

अतिरिक्त शुल्क नबुझाएका एमबीबीएसमा भर्ना भएका नयाँ विद्यार्थीलाई कलेज प्रवेशमा रोक लगाएको विरोधमा विद्यार्थीहरुले आन्दोलन गर्दै आएका छन् । विद्यार्थीहरु टायर बालेर प्रदर्शन गर्दै रिले अनसन बसेका हुन् ।

मेडिकल कलेजका संचालक शुनिल शर्माले अतिरिक्त शुल्क नतिर्ने विद्यार्थीलाई भर्ना नगर्न र पठनपाठन नगर्न निर्देशन दिएपछि विद्यार्थी प्रदर्शनमा उत्रिएका हुन् । विद्यार्थीले नोबेल प्रशासनविरुद्ध नाराबाजी गर्दै धर्नामा बसेका छन् । उनीहरूले मेडिकल शिक्षामा देखिएको माफियाकरण अन्त्य गर्न सरकारसँग माग गरेका छन् । चिकित्सा शिक्षा आयोगले तोकेको एमबीबीएसतर्फको शुल्कभन्दा नोबेलले २० लाखसम्म असुल गर्न खोजेको विरोधमा दुई सातायता विद्यार्थीहरू आन्दोलनमा छन् ।

नेपाल विद्यार्थी संघ, अनेरास्ववियु, अखिल क्रान्तिकारी, नेकपा (एकीकृत समाजवादी)का भ्रातृ संगठन अनेरास्ववियु, समाजवादी विद्यार्थी युनियन मोरङ र चिकित्सा शिक्षा विद्यार्थी आन्दोलन संघर्ष अभियानको सहयोगमा आन्दोलनरत विद्यार्थीले आइतबारदेखि कलेजमा रिले अनसन बस्दै आएका हुन् ।

रिले अनसन बस्ने क्रममा आइतबार सुरक्षा गार्डको लाठ्ठी प्रहारबाट नेकपा (एकिकृत समाजवादी) का भातृ संगठन अनेरास्ववियुका सचिव किसन भगतको टाउको फुटेर घाइते भएका थिए । पीडित विद्यार्थीले ५ विद्यार्थी संगठनको सहयोगमा कलेज प्रशासनमा पुस २१ गते नै तालाबन्दी गर्दा समेत समस्या समाधान भएको छैन ।  

गृह मन्त्रालयले जिल्ला प्रशासन कार्यालय मोरङलाई मेडिकल कलेजले अतिरिक्त शुल्क लिएको र अतिरिक्त शुल्कको बहानामा विद्यार्थीको पठनपाठन रोकिएको भए कानुनी कारबाही गर्न पत्राचार गरेको बताइएको छ ।  

मोरङका प्रमुख जिल्ला अधिकारी काशीराज दाहालले विद्यार्थीलाई कलेजले अतिरिक्त शुल्क मागेको उजुरी जिल्ला प्रहरी कार्यालयमा दिन आग्रह गरेका छन् । तर‚ एमबीबीएस अध्ययनका क्रममा कलेजले आन्तरिक मूल्यांकन गरेर परीक्षामा अंक दिने भएकाले कलेजविरुद्ध उजुरी दिन नसकेको बताएका छन् ।

जिल्ला प्रशासन कार्यालय मोरङको निर्देशनमा पुस ११ गतेदेखि पठनपाठन सञ्चालन गरेको कलेज प्रशासनले अतिरिक्त शुल्क नबुझाएको भन्दै पुस १४ गतेदेखि पठनपाठनमा रोक लगाएको छ । कलेजमा रहेका एक सय विद्यार्थीको कोटामा भर्ना भएका ९६ विद्यार्थीमध्ये नौजना भारतीय, १० जना छात्रवृत्तिका र पाँचजना अतिरिक्त शुल्क बुझाएका विद्यार्थीलाई पढाइरहेको छ । तर आफूहरूलाई अतिरिक्त शुल्क नबुझाएको भन्दै कलेज प्रवेशमा नै रोक लगाएकाले पीडित विद्यार्थीहरुले आन्दोलनलाई निरन्तरता दिँदै आएका छन् ।

कलेजले आयोगले तोकेभन्दा विपरित चार लाख ८२ हजार अतिरिक्त शुल्क बुझाउन दबाब दिएपछि अभिभावक तथा विद्यार्थीले प्रदेश १ का मुख्यमन्त्री, मन्त्रीदेखि जिल्ला प्रशासनमा ज्ञापनपत्र बुझाए थिए  ।  चिकित्सा शिक्षा आयोगले एमबीबीएस अध्ययनका लागि ४४ लाख ३६ हजार २५ रुपैयाँ शुल्क निर्धारण गरेको छ । त्यसमध्ये प्रथम वर्षको १४ लाख ८५ हजार अभिभावकले बुझाइसकेका छन् ।

तर, कलेज सञ्चालक सुनिल शर्मा अतिरिक्त २० लाख शुल्क बुझाउने सम्झौता पत्रमा हस्ताक्षर गराएपछि मात्रै पठनपाठन सुरु गर्ने अडानमा छन् ।