धनकुटा (अस) : धनकुटा–२ भीरगाउँस्थित ढाडेमा आगलागी हुँदा एक घर जलेर नष्ट भएको छ । स्थानीय नविन राईको घरमा बिहीबार बिहान ११ बजे आगलागी हुँदा घर भित्रका लत्ताकपडा, भाडाकुँडासहित काठपातलगायत जलेर नष्ट भएको हो । आगलागीले ९ घार मौरी समेत जलेर नष्ट भएको घरधनी राईले बताए ।
घरमा कोही नभएको बेला आगलागी भएको उनले बताए । गाईवस्तुलाई कुडो पकाउने चुलोबाट सल्किएको आगोले घर पूर्णरुपमा जलेर नस्ट भएको छ । स्थानीय छरछिमेकीहरुको सहयोगले पानी हालेर आगो नियन्त्रमा आएको थियो । लगभग एक घन्टा पछि आगो नियन्त्रणमा आएको थियो ।
करिब एक लाख बराबरको क्षति भएको पीडित राईले बताए । घरमा आगो लाग्दा मानवीय क्षति नभएको बताइएको छ। धनकुटा–२ का वडाध्यक्ष चन्द्रलाल तामाङले आगलागीबारे जानकारी नआएको बताए । यता पीडित राईले सबैजना आगो निभाउनतिर लागि परेकाले कतै जानकारी गराउन नपाएको बताए ।
प्रतिक्रिया दिनुहोस !
