मुस्ताङ: जोमसोम-उत्तर-दक्षिण व्यापारिक मार्ग विस्तारित आयोजनाअन्तर्गत उत्तरी चीनको स्वशासित क्षेत्र कोरला नाका जोड्ने राष्ट्रिय गौरवको बेनी-जोमसोम-कोरला सडक निर्माण कप्पनी र ठेकेदारको ढिलासुस्तीले लामो समयदेखि अलपत्र परेको छ। २०७४ सालदेखि निर्माण आरम्भ गरिएको बेनी-जोमसोम-कोरला सडकको कोवाङ-जोमसोम १८ किमी र उपल्लो मुस्ताङको चराङ छोसेर २५ किमी सडक विगत २ वर्षदेखि अलपत्र परेको हो।
भौतिक पूर्वाधार मन्त्रालयले २०७४ सालमा बेनी-जोमसोम ७६ किमी ४ खण्ड र जोमसोम-कोरला ११० किमी सडक ७ खण्डमा सडक स्तरोन्नतिको योजना अघि बढाएको थियो। जसअन्तर्गत जोमसोम-कोरला ७ खण्डमध्ये ६ खण्ड कालिगण्डकी करिडोर सडकलाई हस्तान्तरण भइसक्दा चराङ छोसेर सडक अलपत्र परेको हो। यस्तै बेनी-जोमसोम ७६ किमी सडकमध्ये ३ खण्डको आशिंकमात्र काम भइरहे पनि कोवाङ-जोमसोम सडक स्तरोन्नति कार्य लामो समयदेखि ठप्पै भएको हो।
गौरवको बेनी-जोमसोम-कोरला सडक खण्डको दुई प्याकेज निर्माण कम्पनीको फेरबदलका कारण ढिलासुस्ती हुन पुगेको आयोजनाले जनाएको छ। बेनी-जोमसोम सडकअन्तर्गत कोवाङ-जोमसोम १८ किमी र जोमसोम-कोरला सडकको चराङ छोसेर २५ किमी सडक स्तरोन्नतिको जिम्मा कोशी एण्ड न्यौपानेले लिएको भए पनि उक्त कन्ट्रक्सनले काम गर्न नसकेपछि उक्त २ प्याकेजको काम सप्तकोशी जलाधार कन्ट्रक्सनलाई सुम्पिएको थियो। तर उक्त कन्ट्रक्सनले पनि काम गर्न नसकेपछि अहिले उक्त दुई प्योकजको सडक स्तरोन्नतिको काम भूमी कन्ट्रक्सनले लिएको छ। निर्माण कम्पनीको फेरबदल र अबको नयाँ कन्ट्रक्सनले अलपत्र सडक स्तरोन्नतिका लागि उपकरण र कामदार कार्यक्षेत्रमा खटाउने तयारी गरेको बेनी-जोमसोम-कोरला सडक आयोजनाको भनाइ छ। आयोजनाले राष्ट्रिय गौरवको कोरला सडकको काम प्राकृतिक प्रकोप र निर्माण कन्ट्रक्सनकै कारण ढिलासुस्ती हुन पुगेको स्वीकार गरेको छ। बेनी-जोमसोम ७६ सडक स्तरोन्नतिका लागि पटक-पटक थपिएको समयअवधि चालु वर्षको चैत्र महिनाभित्रै सकिँदै छ। तर आयोजनाको सडक निर्माणको अवधि सकिन लाग्दा समय निर्माण कन्ट्रक्सनको हेलचक्र्याई र ढिलासुस्तीले कोरला सडक आयोजना कहिले सम्पन्न होला भन्ने प्रश्न उठ्न थालेको छ।
निर्माण कम्पनी र ठेकेदारका कारण ढिलासुस्ती भईरहेको कोवाङ-जोमसोम १८ किमी सडकको भौतिक प्रगति ५ वर्षमा ५५ प्रतिशत र चराङ-छोसेर २५ किमी सडकको भौतिक प्रगति ६० प्रतिशतमात्र छ। कोवाङ-जोमसोमको कालोपत्रे सडक निर्माण लागत ६५ करोड र चराङ-छोसेर २५ किमी ग्राभेल सडक निर्माणको लागत २५ करोडमा निर्माण कन्ट्रक्सनले सम्झौता गरेको थियो। अलपत्र सडकको जिम्मा पाएको निर्माण कम्पनीलाई आयोजनाले पटक-पटक ताकेता गरे पनि काम अघि बढ्न सकेको छैन। चराङ-छोसेर सडकमा ६० प्रतिशत भौतिक प्रगति हुँदा त्यहाँ ३ लाख घनमिटर माटो कटिङ, २५ घन मिटर नाली-वाल निर्माणको काम बाँकी नै छ। त्यहाँको सडकमा २५ मिटर सडकको सवबेस र ग्राभेलिङ गर्ने काम पूरै बाँकी छ। त्यस्तै कोवाङ-जोमसोम सडकअन्तर्गत जोमसोम बजार क्षेत्रमा साढे १ मिटर सडकमा आरसिसी ढलान गर्ने, तटबन्ध निर्माण गर्ने र कालोपत्रे गर्नेलगायतको काम बाँकी रहेको आयोजनाले बताएको छ। जोमसोमक्षेत्रमा सडक स्तरोन्नतिका लागि ४ वर्षअघि नै मापदण्डमा परेका घरटहरा हटाउने र आरसिसी गर्ने काम अघि बढ्न सकेको छैन।
राष्ट्रिय गौरवको कोरला सडकमध्ये ६ खण्ड सकिँदा ५ खण्डको काम सम्पन्न हुन बाँकी छ। जसमध्ये बेनी-जोमसोमको पहिलो खण्डको काम ६५ प्रतिशत, दोस्रो खण्डको ६५ प्रतिशत र तेस्रो खण्डको ८५ प्रतिशत र चौथो खण्डको ६० प्रतिशत भौतिक प्रगति छ। बेनी-जोमसोम सडकअन्तर्गत म्याग्दीको भीरकाटे र काभ्रेभीर सडकमा अहिले रक कटिङ गरी सडक चौडा गर्ने काम भइरहेको आयोजनाले जनाएको छ। पछिल्लो समय पर्वतको मालढुङ्गादेखि बेनी १३ किमी कालोपत्रे, बेनीदेखि गलेश्वर २ किमी कालोपत्रे र जोमसोम-कागबेनी सडक कालोपत्रे गर्ने थप ३ वटा योजना थपिएका छन्।
राष्ट्रिय गौरवको कोरला सडक आयोजनाको कूल लागत ९ अर्ब ७५ करोड छ। आयोजनाले हालसम्म ७ अर्ब ५५ करोडको ठेक्का सम्झौता गरेकोमा ५ अर्ब ४० करोड खर्च भइसकेको जनाएको छ। आयोजनाको हालको भौतिक प्रगति ६५ प्रतिशत र वित्तीय प्रगति ६० प्रतिशत भएको बताएको छ। आयोजनाअन्तर्गत कोरला सडकमा ३८ सडक पुलमध्ये १६ वटा निर्माणाधीन, १९ वटा डिजाइन र ३ वटा पुल सम्पन्न भइसकेको जनाएको छ। आयोजनाले म्याग्दीको भीरकाटे क्षेत्रमा ३ सय मिटर सुरुङ मार्ग विस्तार गर्न मन्त्रालयलाई प्रस्ताव अघि बढाएको छ।
प्रतिक्रिया दिनुहोस !
