सिन्धुली : सिन्धुलीमा मुख्य निर्वाचन अधिकृत र ८ वटा निर्वाचन अधिकृतको कार्यालय स्थापना गरिएको छ । बिहीबार सिन्धुलीको कमलामाई नगरपालिका ५ बागवानी केन्द्रमा मुख्य निर्वाचन अधिकृतको कार्यालय स्थापना गरिएको हो । यस्तै दुधौली नगरपालिकासहित अन्य ८ वटा पालिकामा निर्वाचन समेत एकैसाथ निर्वाचन अधिकृतको कार्यालय स्थापना गरिएको मुख्य निर्वाचन अधिकृत ध्रुव प्रसाद सापकोटाले जानकारी दिए । प्रमुख जिल्ला अधिकारी रमेश न्यौपाने, प्रहरी उपरिक्षक विमलराज कंडेल, जिल्ला निर्वाचन अधिकृत पुष्पा कुमारी झा लगायतको उपस्थितीमा कार्यालयको स्थापना गरिएको हो ।
आगामी वैशाख ३० गते हुने स्थानीय तहको निर्वाचनका लागि मुख्य निर्वाचन अधिकृत र निर्वाचन अधिकृतको कार्यालयहरु स्थापना गरेर संचालन थालिएको सापकोटाले बताए। मुख्य निर्वाचन अधिकृत सापकोट धनुषा जिल्ला अदलातका न्यायाधीश हुन् ।यस्तै, जिल्लाको दुधौली नगरपालिकामा दिपक ढकाललाई निर्वाचन अधिकृत तोकिएको छ । सुनकोशी गाउँपालिकामा लक्ष्मी पाण्डे, गोलन्जोर गाउँपालिकामा प्रकाशजंग कार्की, घ्याङलेख गाउँपालिकामा विमल थापा, फिक्कल गाउँपालिकामा डिकबहादुर कार्की, मरिण गाउँपालिकामा दुर्गा बन्जाडे र हरिहरपुरगढी गाउँपालिकामा भरत कुमार दाहाललाई निर्वाचन अधिकृतका रुपमा खटाइएको छ ।
‘जिल्लाका नौवटै पालिकामा कार्यालय संचालन भएको छ । त्यहाँ कर्मचारी व्यवस्थापन तथा आवश्यक काम सुरु गरिएको हो,' सापकोटाले भने । आयोगले आगामी आइतबार र सोमबारका दिन उमेदवारी दर्ताको मिति तोकेको छ । त्यसको तयारी समेत थालिएको सापकोटले जानकारी दिए।
उता जिल्लामा २३ वटा मतदानस्थल अति सम्बेदनशील रहेको प्रमुख जिल्ला अधिकारी रमेश न्यौपानेले बताए । 'जिल्लाका कुल १ सय ४७ मतदान स्थल मध्ये २३ वटा अति सम्बेदनशील र ६२ वटालाई सम्बेदनशटील स्थलका रुपमा हेरिएको छ,'न्यौपानेले भने ।
यस्ता अतिसम्बेदनशील र सम्बेदनशिल मतदान स्थलको सुरक्षाका लागि आवश्यक प्रबन्ध मिलाइने उनको भनाइ छ । यस्तै जिल्लामा कुल १ सय ४७ मतदान स्थलअन्तर्गत २ सय ६८ वटा मतदान केन्द्रहरु रहेका छन् । जिल्लामा निर्वाचनलाई शान्तिपूर्णरुपमा सम्पन्न गर्न सुरक्षा नियकाका तर्फबाट गर्नुपर्ने सबैखाले काम तीव्र गतिमा भइरहेको छ ।
‘जिल्लामा मुख्य निर्वाचन अधिकृत र अधिकृतहरुको कार्यालय स्थापना भएको र आइतबार र सोमबार हुने मनोनयन दर्तालाई व्यवस्थित गर्नका लागि आवश्यक तयारी समेत भइरहेको छ,' प्रजिअ न्यौपानेले भने ।
प्रतिक्रिया दिनुहोस !
