बाजुराको बुढीगंगाको त्रिशक्ति मावि मतदान केन्द्रमा तनाव, प्रहरीले गर्यो हवाई फायर
बाजुरा : बुढीगंगा नगरपालिका-९ को त्रिशक्त मावि मतदान केन्द्रमा तनावको स्थिति सृजना भएको छ।
नेकपा एमाले र सत्ता गठबन्धनका कार्यकर्ताबीच विवाद उत्पन्न भएपछि प्रहरीले हवाई फायर समेत गरेको छ।
स्थिति नियन्त्रणमा लिन प्रहरीले हवाई फायर गरेको प्रमुख जिल्ला अधिकारी प्रकाशचन्द्र अधिकारीले अन्नपूर्णलाई जानकारी दिए । उनले भने,' स्थिति नियन्त्रणमा लिन प्रहरीले हवाई फायर गर्यो। अहिले अवस्था सामान्य छ। मतदान सुरु भइसकेको छ।'
तनावको स्थिति सिर्जना भएपछि केही समय मतदान स्थगित भयो।
३० वैशाखमा स्थगित भएको निर्वाचन बिहीबार बिहान ७ बजेदेखि पुनः मतदान भइरहेको छ ।
वैशाख ३० गते भएको निर्वाचनमा धाँधली भएपछि मतदान स्थगित भएको थियो।
सो नगरपालिकाको मेयर पदमा नेपाली कांग्रेसका रंगबहादुर खाती र एमालेका रामबहादुर बानियाँ उम्मेदवार छन् ।