सर्लाही ४ मा गठबन्धनलाई कांग्रेस छाडेका अमरेशको चुनौती

मलंगवा : सर्लाही क्षेत्र नम्बर ४ मा यसपालीको चुनाव रोचक हुने भएको छ। अगामी मंसिर ४ गते हुने प्रतिनिधिसभा तथा प्रदेशसभा निर्वाचनमा सर्लाही क्षेत्र नम्बर ४ मा स्वतन्त्र उम्मेदवारको बलियो उपस्थिति देखिएको छ।

सतागठबन्धन र एमाले- जसपा गठबन्धनलाई स्वतन्त्र उम्मेदवारले चुनौती दिएका छन्।

सतागठबन्धनबाट नेपाली कांग्रेसका पूर्वजिल्ला सभापति नागेन्द्र कुमार राय चुनावी मैदानमा छन् भने एमाले- जसपा गठबन्धनबाट जसपाका राकेशकुमार मिश्र चुनावी मैदानमा छन् । स्वतन्त्रतर्फ अमरेश कुमार सिंह र मधुमाला यादव चुनावी मैदानमा उत्रेका छन् । सिंह निवर्तमान सांसद हुन् भने यादव संविधानसभा सदस्य एवं माओवादी केन्द्रका नेता शिवपूजन रायकी छोरी हुन् ।

नेपाली कांग्रेसबाट टिकट नपाएपछि सिंहले पनि स्वतन्त्रबाट उम्मेदवारी दिएका हुन् । सिंह यस क्षेत्रबाट २०७० सालको संविधान सभा निर्वाचन र २०७४ सालको प्रतिनिधिसभाको निर्वाचनमा कांग्रेसबाट निर्वाचित नेता हुन् । बलियो जनाधार आफ्नो पक्षमा रहेको भन्दै चुनाव आफूले नै जित्ने सिंहको दाबी छ ।

माओवादीको राम्रो मत रहेको र पार्टीले आफ्नो मान्छेलाई टिकट नदिएपछि शिवपूजनले आफ्नी छोरीलाई स्वतन्त्रबाट उम्मेदवारी दिन लगाएका हुन् । 

नेपाली कांग्रेसबाट टिकट नपाएपछि सिंहले पनि स्वतन्त्रबाट उम्मेदवारी दिएका हुन् । सिंह यस क्षेत्रबाट २०७० सालको संविधान सभा निर्वाचन र २०७४ सालको प्रतिनिधिसभाको निर्वाचनमा कांग्रेसबाट निर्वाचित नेता हुन् ।

बलियो जनाधार आफ्नो पक्षमा रहेको भन्दै चुनाव आफूले नै जित्ने सिंहको दाबी छ । ‘स्वतन्त्रबाट उम्मेदवारी दिएपनि जनता मेरो साथमा छन्, ' सिंहले भने, ‘यो क्षेत्रमा मैले गरेको विकास नै मेरो जित्ने आधार हो । गठबन्धनले केही फरक पार्दैन ।'

'यस क्षेत्रका जनता सचेत छन् । कामको मूल्यांकन गरेर मतदान गर्छन् । पार्टीले मलाई टिकट नदिएर ठूलो गुन लगाएको छ । चारेतारे झण्डा छोडेर सबैले सम्मान गर्ने राष्ट्रिय झण्डा बोक्न पाएकोमा खुशी लागेको छ । मैले नयाँ राजनीतिक जीवन पाएको छु,' सिंहले भने।

लोकन्तत्रको सबलीकरण, भ्रष्टाचार, परिवारवादको अन्त्यका लागि आफूले उम्मेदवारी दिएको सिंहले बताए । उनले भने,' निष्ठा र सिद्धान्तको राजनीतिक गर्ने मान्छे हुँ । लोकतन्त्रको रक्षा र विकासका लागि सदैव एक सच्चा सिपाही हुँ । शिक्षा, स्वास्थ्य, सडक, सिचाईं, शान्ति सुरक्षालाई मजबुत पार्नका लागि कसैसँग कुनै किसिमको सम्झौता गर्दिन।'

नेता सिंहले आफ्नो लडाईं स्वतन्त्रसँग हुने र  गठबन्धनबाट कुनै फरक नपर्ने ठोकुवा गरे।

यस क्षेत्रमा दलगत उम्मेदवारभन्दा स्वतन्त्र उम्मेदवारको चर्चा बढि रहेको गोडैता नगरपालिकाका रंजित ठाकुरले बताए । उनले अहिले  सिंह र यादवकै बारेमा चर्चा हुने गरेको बताए।

बलरा नगरपालिका गडहियाका स्थानीयबासीले यसपटकको चुनावमा स्वतन्त्र उम्मेदवारले नै बाजी मार्ने दाबी गरेका छन् । सिंह दुईपटक यस क्षेत्रबाट चुनाव जितिसकेकाले उनको पक्षमा राम्रो जनाधार रहेको स्थानीयको अड्कल छ।