विद्यार्थी नेता चेतन अएडीको मृत्युपछि मार्तडी बजार तनावग्रस्त
मंसिर ५, २०७९ सोमबार ११:१६:०
बाजुरा : आइतबार बाजुराको त्रिवेणी नगरपालिका-७ मा मतदानका क्रममा उत्पन्न विवादका कारण दुईजनाको मृत्यु भएपछि बाजुरा सदरमुकाम मार्तडी तनावग्रस्त भएको छ।
त्रिवेणी-७ मा नाटेश्वर मतदान केन्द्रमा नेकपा एमाले र नेपाली कांग्रेसका कार्यकर्ताबीच झडप हुँदा प्रहरीले चलाएको गोली लागेर स्थानीय २५ वर्षीय सुरेन्द्र अएडीको मृत्यु भएको थियो।
सोही विषयलाई लिएर कांग्रेस कार्यकर्ताहरुले आइतबार राति एमालेका विद्यार्थी नेता चेतन अएडीको घरमै गएर कुटपिट गरेका थिए। उपचारका क्रममा उनको अछामको बयलपाटा अस्पतालमा आज मृत्यु भएको हो।
विद्यार्थी नेता अएडीको कुटपिट गरी हत्या भएपछि मार्तडी बजार तनावग्रस्त बनेको छ।
मार्तडीमा बिहानदेखि एमालेका कार्यकर्ताले नाराबाजी र टायर बालेर प्रदशर्न गरिरहेका छन्। मार्तडी बजार सुनसान छ। स्थानीय त्रसित छन्।
प्रदर्शनकारीहरुले साँफे- मार्तडी खडक खण्डमा समेत गाडि चल्न दिएका छैनन्। उनीहरुले मृतक अएडीको न्याय र सुरक्षामा लापरबाही गर्ने सुरक्षाकर्मीलाई कारबाहीको माग गरेका छन्।
प्रतिक्रिया दिनुहोस !
