विराटनगर : मोरङको निर्वाचन क्षेत्र नं. ४ बाट माओवादी केन्द्रका अमनलाल मोदी प्रतिनिधिसभा सदस्य पदमा निर्वाचित भएका छन् ।
आफ्ना निकटतम प्रतिस्पर्धी एमालेका विनोद ढकाललाई भारी मतान्तरले पराजित गर्दै मोदी पुनः एकपटक प्रतिनिधि सभा सदस्यमा निर्वाचित भएका हुन् ।
उनले ३० हजार ६१२ मत प्राप्त गर्दा उनका प्रमुख प्रतिस्पर्धी एमालेका विनोद ढकालले २४ हजार ४६३ मत ल्याएका छन् । मोदीले ढकाललाई ६ हजार १४९ मतान्तरले पराजित गरेका हुन् । मोदीले यसअघि पनि सो क्षेत्रबाट २०७० को संविधान सभा र २०७४ को प्रतिनिधि सभाको चुनाव जितेका थिए । उनी नेकपा (माओवादी केन्द्र) का केन्द्रीय सदस्य समेत हुन् ।
मोदीसँग पराजय व्यहोरेका ढकाल भने एमालेका केन्द्रीय सदस्य एवं मोरङका जिल्ला इन्चार्ज हुन् । लामो राजनीति अनुभव बटुलेर पनि कहिल्यै लाभको पदमा नपुगेका उनी यसअघि २०७४ को स्थानीय निर्वाचनमा पनि भीम पराजुलीसँग पराजित भएका थिए । विराटनगरको मेयर पदका लागि भएको निर्वाचनमा कांग्रेसका पराजुलीले उनलाई भारी मतान्तरले पराजित गरेका थिए ।
त्यसअघि ढकालले मोरङको क्षेत्र नं. ७ बाट पनि चुनाव लडेका थिए । तर, कांग्रेसका डा. शेखर कोइरालाबाट पराजित बने ।
प्रतिक्रिया दिनुहोस !
