फेवा किनारमा सुरु भयो सडक महोत्सव
पोखरा: अंग्रेजी नयाँ वर्ष सन् २०२३ लाई स्वागत गर्न फेवाताल किनार लेकसाइडमा बुधबारदेखि सडक महोत्सव सुरु भएको छ। पुस १७ गते सम्म चल्ने महोत्सवका लागि फेवाताल किनारको तीन किलो मिटर सडक क्षेत्र झकीझकाउ पारिएको छ।
महोत्सवको उद्घाटन कार्यक्रममा सांस्कृतिक झाँकी सहित बिभिन्न जातजातीको भेशभूषा प्रदर्शन गरिएको थियो। सडक महोत्सवको उद्घाटन गर्दै पोखरा महानगरपालिकाका मेयर धनराज आचार्यले राज्यले पोखरालाई देशकै पर्यटकीय राजधानी घोषण गरेर पर्यटन प्रवद्धन गर्नु पर्नेमा जोड दिए । रेवान पाखराले गर्दै आएको सडक महोत्सव नेपालकै ठूलो महोत्सव रहेको र महोत्सवले स्वदेशी तथा विदेशी पर्यटन प्रवद्धन गर्न महत्वपूर्ण भूमिका खेलेको बताए ।
पाँच दिनसम्म चल्ने सडक महोत्सवले कोरोनाको कारण थला परेको पर्यटन उद्योगलाई चलायमान बनाउने पोखरा पर्यटन परिषदका अध्यक्ष पोमनारायण श्रेष्ठले बतए । डिसेम्बर महिनाको दोस्रो हप्ता देखि पर्यटकको आगमन कमहुने भएकोले पर्यटकलाई आकर्षण गर्न २०५६ साल देखि पोखराको लेकसाइडमा रेस्टुरेन्ट एन्ड बार एसोसियन (रेवान) पोखराले सडक महोत्सव आयोजना गर्दै आएको हो । अंग्रेजी नयाँ वर्षमा स्वदेशी तथा विदेशी पर्यटकलाई पोखरा घुम्न आउने वातावरण तयार गर्न सडक महोत्सव अयोजना गरिदै आएको आयोजक संस्था रेवानका अध्यक्ष नरेश भट्टराईले बताए ।
महोत्सवमा नेपाली संस्कृतिक कार्यक्रम, विभिन्न जातजानीका सांस्कृतिक झाकी, नाचगानको अवलोकन गर्दै स्वदेशी तथा विदेशी खानाका परिकार सडक किनारमा बसेर खाँदै रमाउने व्यवस्था आयोजकले मिलाउदै आएका छन् । यसैले महोत्सवका नारा नै सडकमै खाऔं, सडकमै रमाउ राखिएको छ । े
महोत्सवमा सांस्कृतिक कार्यक्रम, मौलिक भेशभूषा प्रदर्शन, दोहोरी गीत प्रतियोगिता, रात्रिकालीन कन्सर्ट, पोखराका प्रमुख पर्यटकीय क्षेत्रका डकुमेन्ट्री प्रदर्शन, बिभिन्न खेलकुदका गतिविधि पनि हुने कार्यक्रमका संयोजक समेत रहेका अध्यक्ष भट्टराईले बताए । महोत्सवले पोखराको लेकसाइड क्षेत्रका मात्र नभएर कास्की जिल्लाकै पर्यटन उद्योग, कृषि उत्पादनको खपत लगायत हरेक क्षेत्र चलायमान हुने आयोजकले बताएका छन् । महोत्सवमा करिब ४ लाख दर्शकले अवलोकन गर्ने आयोजकको विश्वास छ । महोत्सव सम्पन्न गर्न करिब ७० लाख खर्च हुने र करिब ८० लाख आम्दानी हुने अयोजकको अनुमान छ । महोत्सवमा पोखरा आउने पर्यटकलाई विशेष छुटको रुपमा होटल संघ पोखराले २० प्रतिशत कोठामा छुट दिने संघका अध्यक्ष लक्ष्मण सुबेदीले बताए ।
पछिल्लो समयमा अंग्रेजी नयाँ वर्ष मनाउन आन्तरिक र वाह्यि पर्यटकको चाप बढ्दै गएको छ । पोखरा आउने पर्यटकहरु सहासीक गतिविधि प्याराग्लाइडिङ, अल्ट्रालाइट, बञ्जी, जिप लाइन, स्विङ लगायतका खेलमा रमाउने गर्दछन् । महोत्सवकै छेको पारेर पोखरा आएका पर्यटकहरु अन्नपूर्ण पदायत्रा क्षेत्रका धम्पुस, घोरेपानी, घान्द्रुक लगायतका क्षेत्र पनि घुम्ने गर्दछन् ।