डडेल्धुरा: डडेल्धुरा सदरमुकाम राजमार्ग छेउछाउमा रहेका घरधनी र जग्गाधनीले मुआब्जा रकम पाउन थालेका छन् । सडक चौडा गर्नका लागि सडक क्षेत्राधिकारभित्र रहेका घर र जग्गाधनीलाई सरकारी मुल्यांकनका आधारमा मुआब्जा दिन थालिएको हो । सदरमुकाम क्षेत्रमा दायाँबायाँ १५र१५ मिटर सडक चौडा पार्न क्षतिपूर्ति दिन लिएको हो ।
विगत लामो समयदेखि मुआब्जाको विषयलाई लिएर सडक चौडा पार्ने काममा अवरोध हुँदै आएको थियो । तर,डडेल्धुरा जिल्ला सदरमुकाम बाघखोरबासीहरूले मुआब्जा रकम पाउन थालेसँगै सदरमुकामको सडक फराकिलो बन्ने कुरामा स्थानीय ढुक्क छन् । सडक फराकिलो बनाउन स्थानीयलाई मुआब्जा वाफतको रकम बाँडिन लागेको जिल्ला प्रशासन कार्यालय डडेल्धुराले जनाएको छ । स्थानीयको जमिन लागतकट्टा गरि सडक डिभिजन कार्यालयका नाममा नामसारि गरिएपछि स्थानीयलाई मुआब्जा वाफतको रकम बाँडिन थालिएको हो ।
जिल्ला प्रशासन कार्यालयमार्फत गएको सोमबार ११ जनालाई मुआब्जावाफत २ करोड ९० लाख रकम बैंक खातामा जम्मा गरिएको तत्कालिन प्रमुख जिल्ला अधिकारी मोहनराज जोशीले जानकारी दिए । प्रजिअ जोशी अहिले सरूवा भइसकेका छन् ।
पहिलो चरणमा १०५ जनालाई मुआब्जा वितरण गर्न २० करोड रकम उपलब्ध भएको जनाइएको छ । जिल्ला सदरमुकाम बाघखोर क्षेत्रमा सडक फराकिलो बनाउँदा उचित क्षतिपूर्ति उपलब्ध गराउनु पर्ने भनि अदालतको फैसाला भएको थियो । पाँच मिटर मात्रै कालोपत्रे गरिएको सडक अब दायाँबायाँ १५र१५ मिटरले फराकिलो बनाइने जनाइएको छ ।
मुआब्जा वाफत स्थानीयलाई ८४ करोड ८५ लाख रुपैयाँ आवश्यक पर्दछ । तर सरकारले पहिलो चरणमा उक्त रकम छुटाएको थियो । स्थानीयलाई मुआब्जा वाफतको सबै रकम उपलब्ध गराए पछि सडक फराकिलो बनाउन टेण्डर आह्वान गरिने सडक डिभिजन कार्यालयले जनाएको छ । सडक फराकिलो बनाउन ४५ करोड रकम बराबरको टेण्डर हुने सडक डिभिजन कार्यालय डोटीले जनाएको छ ।
यसअघि सडक फराकिलो पार्न दुईपटक टेण्डर आह्वान गरिए पनि काम सुरु हुन सकेको थिएन । अदालतको फैसला अनुसार स्थानीय बारम्बार अदालत पुगेपछि टेण्डर रद्द गरिएको थियो । मुआब्जा पाइसकेका स्थानीय आफैले सडक क्षेत्र भित्र पर्ने घरहरु हटाउनुपर्ने जिल्ला प्रशासन कार्यालयले जनाएको छ। हाल मुआब्जा पाइसकेकाहरूलाई सडक क्षेत्रमा पर्ने घरहरु समय तोकेर आफै हटाउन आग्रह गर्ने तयारी भइरहेको छ ।
सडक चौडा नहुँदा सदरमुकाममा हिँडडुल गर्न दैनिक आवातजावत गर्न पनि समस्या हुन्छ भने ट्राफिक जाम पनि दिनहुँ हुने गर्दछ । करिब दुई किलोमिटर दुरी सम्म बजार क्षेत्र रहेको छ ।
प्रतिक्रिया दिनुहोस !
