धनगढी : आधारभूत तहको परीक्षामा एक नीजि र १७ सामुदायिक गरी १८ विद्यालयको नतिजा शून्य आएपछि धनगढी उपमहानगरपालिकाले नगरक्षेत्रमा भारतको राजधानी दिल्लीको शिक्षा मोडेल लागू गर्ने तयारी गरेको छ ।
उपमहानगरपालिककाले उपमेयर कन्दकला रानाको नेतृत्वमा सुदूरपश्चिम विश्वविद्यालयका पूर्वरजिष्टार डाक्टर हेमराज पन्तसहितका शिक्षाविज्ञहरू,१९ वडाबाट एक/एकजना प्रधानाध्यापक, कार्यपालिकाका सदस्यहरू,शिक्षा महाशाखाका प्रमुखहरू गरी ३५ जनाको टोली दिल्ली पठाएको छ ।
टोलीमा संलग्न डाक्टर हेमराज पन्तले दिल्लीका मुख्यमन्त्रीले पछिल्लो एक दशकमा गरेको आमुल परिवर्तन अथवा केजरीवाल मोडेलको अध्ययन गरेर उपमहानगरको शिक्षा सुधारका लागि प्रतिवेदन दिइने बताए ।
दिल्लीका मुख्यमन्त्री केजरीवालले शिक्षाको सुधारका लागि सरकारी विद्यालयमा अंग्रेजी माध्यममा पढाइ, विद्यालयका पूर्वाधारमा लगानी र सौन्दर्यीकरण,शिक्षकहरूको क्षमता अभिवृद्धि,खुला तथा भर्चुअल कक्षाको मोडल सञ्चालनमा ल्याएका छन् ।
दिल्लीमा अहिले सामुदायिक विद्यालयमा ९० प्रतिशतभन्दा बढी नतिजा आउने गरेको छ । टोलीले भारतको राजधानी दिल्लीका सहिद हेमुकालाणी सर्वोदय बालविद्यालय,सोही विद्यालयभित्र छुट्टै सञ्चालन भइरहेको दिल्ली मोडेल भर्चुअल स्कुल र गभर्मेन्ट ब्वाइज एसआर सेकेण्डरी स्कुललगायतको अवलोकन गरेको जनाएको छ । स्कुलले कसरी पठनपाठन गरिरहेको छ भनेर टोलीले विद्यालयका प्रधानाध्यापकसँग छलफल गर्नुका साथै पठनपाठनका क्रममा अपनाउने प्रविधिबारेमा पनि जानकारी लिएको छ ।
पारिवारिक समस्या भएका,क्रिकेट, फुटबललगायत खेलकुद एकेडेमीमा भर्ना भएर नियमित विद्यालय आउन नसक्ने बालबालिहरूका लागि भर्चुअल कक्षाको व्यवस्था गरिएको हो । ‘भौतिक रुपमा विद्यालयमा आउन नसक्ने विद्यार्थी शिक्षाको अवसरबाट बञ्चित नहोउन भनेर यस्तो गरिएको रहेछ,'भ्रमण टोलीकी संयोजक उपमेयर कन्दकला रानाले भनिन् ।
केजरीवालको शिक्षा मोडेल अहिले दक्षिण एशीयाको नमूना मोडेलको हो । उनले भाषाको कुरामा बढि जोड दिएका छन् । केजरीवालले विद्यार्थीलाई दिइने किताबी ज्ञानभन्दा पनि जीवनमा उपयोगी शिक्षाको मोडेल तयार पारेर लागू गरेका हुन् ।
त्यहाँका अधिकांश सरकारी विद्यालयमा विद्यार्थीहरूको करियरको बारेमा समेत प्रशिक्षण हुनेगर्छ । व्यवस्थापन,फर्निचर, स्मार्टबोर्ड, प्रयोगशाला, पुस्तकालय, स्वीमिङपुल, खेलकुद सुविधा आदिले दिल्ली विद्यालय सुसज्जित रहेको भ्रमण टोलीमा सहभागी कार्यपालिका सदस्य माया भण्डारीले बताइन् ।
‘सरकारी विद्यालयको शिक्षा पुरै निशुल्क छ । पाठ्यसामाग्रीहरु, ल्यापटपसहित शैक्षिक सामग्री सरकारले उपलब्ध गराउँछ र निजी विद्यालय जत्तिकै सुविधा र गुणस्तर रहेछ,'उनले भनिन् । धनगढी उपमहानगरपालिकाका मेयर गोपाल हमालले शिक्षाले नै देशको भविष्य बन्ने भएकाले सिमित स्रोत साधनका बीच पनि सामुदायिक विद्यालयको शिक्षामा सुधार ल्याउने प्रयास गरिएको बताए ।
‘केजरीवाल मोडेल दक्षिण एशियाको नमूना मोडेल हो । धनगढीमा त्यो मोडेल लागू गरिनेछ,' मेयर हमालले भने । भ्रमण टोली भारतमै छ । उसले अझै त्यहाँका चर्तित सामुदायिक विद्यालयको भ्रमण गर्नेछ ।
प्रतिक्रिया दिनुहोस !
