१२ वर्षपछि दाङको संस्कृत विश्वविद्यालयमा दीक्षान्त समारोह (तस्बिरसहित)

दाङ : दाङको बेल्झुण्डीस्थित नेपाल संस्कृत विश्वविद्यालयको दीक्षान्त समारोह भएको छ । १२ वर्षपछि संस्कृत विश्वाविद्यालयको दीक्षान्त समारोहमा ५७५ जना दीक्षित भएका हुन् । विद्यावारिधि उपाधि हासिल गरेका १२० जना,आचार्य तह उत्तिर्ण १४५ जना,शास्त्री तह उत्तिर्ण १६३,आयुर्वेद स्नातक उत्तिर्ण ५७ र एक वर्षे शिक्षा शास्त्री उत्तिर्ण गरेका ९० जना दीक्षित भएका हुन् ।

समारोहमा प्रत्येक वर्ष विभिन्न विधामा उत्कृष्ट हुने विद्यार्थीलाई कूलपति समेत रहेका प्रधानमन्त्री पुष्पकमल दाहाल 'प्रचण्ड'ले विभिन्न पदक तथा विभूषणबाट विभूषित गरेका थिए ।

सो अवसरमा प्रधानमन्त्री ‘प्रचण्ड’ले विश्वविद्यालयको पाठ्यक्रमलाई समयसापेक्ष बनाउन सरकार प्रतिवद्ध रहेको बताए । विश्वविद्यालयको पाठ्यक्रमलाई समयसापेक्ष बनाउने कुरालाई नेपाल सरकारले आफ्नो नीति तथा कार्यक्रमभित्र समेटेको प्रधानमन्त्रीको भनाइ छ । 

वर्तमान सरकार नेपालभित्रै गुणस्तरीय शिक्षाको विकास एवम् प्रवर्द्धनका लागि विश्वविद्यालयबीच प्रभावकारी समन्वय र प्रतिस्पर्धालाई बढावा दिन चाहेको बताए । विद्यार्थी तथा विश्वविद्यालयको जनशक्तिको क्षमता विकास हुने गरी सरकारी क्षेत्रका अध्ययन, अनुसन्धानका कार्यहरू र सरकारी कार्यक्रमका लागि आवश्यक परामर्श सेवा विश्वविद्यालयमार्फत् गर्ने व्यवस्था मिलाउन पनि सरकार प्रतिवद्ध रहेको प्रधानमन्त्रीको भनाइ छ ।

प्रधानमन्त्री प्रचण्डले नयाँ–नयाँ खोज,आविष्कार तथा विकासका आधारहरु सबै शिक्षामा नै निर्भर हुने भएकाले यस विश्वविद्यालयबाट राष्ट्रले ठूलो अपेक्षा राखेको बताए ।

विविध कारणले गर्दा संस्कृत विश्वविद्यालयको दीक्षान्त समारोह विगत बाह्र वर्षयता सम्पन्न हुन सकेको भन्दै प्रधानमन्त्री प्रचण्डले छात्रछात्राहरूको वर्तमान र भविष्यसँग गाँसिएका यस्ता कार्यक्रमहरूलाई समयमै आयोजना गर्न विश्वविद्यालय प्रयत्नरत रहनुपर्ने बताए ।