समाजवादी मोर्चा घोषणाको लागि बालुवाटारमा बैठक

काठमाडौं : सत्तारुढ नेकपा माओवादी केन्द्रसहितका दलहरु समाजवादी मोर्चा घोषणाको अन्तिम तयारीमा जुटेका छन्। असार १ गते समाजवादी मोर्चा गठनको घोषणा गर्ने भनेपनि आन्तरिक तयारी नपुगेको भन्दै घोषणा भएको थिएन। सम्भवत : आज या भोलि मोर्चा घोषणा हुने नेताहरुले बताएका छन्। 

मोर्चामा माओवादी केन्द्र, एकीकृत समाजवादी, जसपा, विप्लव नेतृत्वको नेकपा सहभागी हुने गरी छलफल भइरहेको छ। =आइतबार बिहान समाजवादी मोर्चाबारे छलफल गर्न नेकपा माओवादी केन्द्रका अध्यक्ष एवम् प्रधानमन्त्री पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल, जनता समाजवादीका अध्यक्ष उपेन्द्र यादव, नेकपाका महासचिव नेत्रबहादुर चन्द विप्लब लगायतका नेताहरुबीच बालुवाटारमा छलफल भइरहेको माओवादी केन्द्रका एक नेताले अन्नपूर्णलाई जानकारी दिए। उनीहरुबीचको छलफल पश्चात समाजवादी मोर्चा मोडालिटी, आगामी रणनीति र घोषणालाई अन्तिम रुप दिइने एक नेताले जानकारी दिए। 

चार दलका शीर्ष नेता छलफलमा जुट्नु अगाडि दोस्रो तहका नेताहरुबीच पनि बिहान छलफल भएको हो। कार्यदलले मोर्चाको अवधारणापत्रको मस्यौदा तयार पारेको छ। यसलाई अन्तिम रूप दिन आज बैठक बोलाइएको हो।

समाजवादी मोर्चा बने २७५ सदस्यीय प्रतिनिधि सभामा ५४ सिटसहित तेस्रो निर्णायक शक्ति निर्माण हुनेछ। डा. बाबुराम भट्टराई नेतृत्वको नेपाल समाजवादी पार्टी मोर्चामा सहभागी हुने नहुने टुंगो लागेको छैन। आजको बैठकमा भट्टराई सहभागी छैनन्।

यता नेपाल कम्युनिष्ट पार्टी (एकीकृत समाजवादी)का उपाध्यक्ष राजेन्द्र पाण्डेले सरकारमा रहेका र सरकार बाहिर रहेका कम्युनिष्ट दलबीच कार्यगत एकता असार ४ गते हुने जानकारी दिए। ‘कम्युनिष्टबीच कार्यगत एकता गर्दै देशको राजनीतिक अस्थिरता रोक्नका लागि मोर्चा गठन गर्न लागिएको हो।’ उपाध्यक्ष पाण्डेले भने, ‘सरकारमा देखिएको अस्थिरता रोक्न र सबैलाई एकीकृत गरेर अगाडि बढ्न सहज होस् भनेर मोर्चा गठनको पहल एक वर्षअघिदेखि भएको थियो।’

यता नेकपा एमालेका अध्यक्ष केपी शर्मा ओलीले समाजवादी मोर्चा एमाले विरुद्ध मुकाबिला गर्न बनाउन खोजेको बताएका हुन्। शनिबार एमाले पार्टी कार्यालयमा आयोजित पार्टी प्रवेश गर्ने कार्यक्रमलाई सम्बोधन गर्दै ओलीले माओवादी केन्द्र, एकीकृत समाजवादीसहितका साना दल मिलेर बन्न लागेको समाजवादी मोर्चाको कुनै औचित्य नभएको बताएका हुन् ।

उनले विपक्षी दल नेकपा एमालेका अध्यक्ष केपी शर्मा ओलीले समाजवादी मोर्चाको कुनै औचित्य नभएको टिप्पणी गरेका छन् । समाजवादी मोर्चा एमालेसँग मुकाबिला गर्न र कांग्रेसलाई तर्साउन बन्न लागेको उनको तर्क छ। ओलीले भने,‘गठबन्धनले मात्र नपुगेर एउटा समाजवादी मोर्चा चर्चा रहेछ। समाजवादी मोर्चा केकालागि भन्दा एमालेविरुद्ध मुकाबिला गर्नलाई रहेछ। त्यसका दुई वटा उद्देश्य छ एउटा एमालेविरुद्ध मुकाबिला गर्ने र अर्को कांग्रेसलाई तर्साउने, समाजवादी मोर्चा बनाउँ त भनेर।’