नेपाली सेनाको भूमिका र संख्या कटौतीका बारेमा बहस हुनु दुःखद : एमाले
साउन १, २०८० सोमबार ८:५७:५
काठमाडौं : नेकपा एमालेले नेपाली सेनाको संख्या राष्ट्रको सुरक्षासँग मात्र होइन अन्तर्राष्ट्रिय शान्ति मिसनसँग पनि जोडिएको विषय भएको बताएको छ।
पछिल्लो समयमा सेनाको संख्याको विषय भइरहेको बहसलाई लक्षित गर्दै एमालेका महासचिव शंकर पोखरेलले नेपाली सेनाको भूमिका र संख्या कटौतिका बारेमा बहस हुनु दुःखद भएको टिप्पणी गरेका छन्।
‘नेपाली राजनीति अस्थिरताको शिकार भएको, सामाजिक अराजकताका कारणले राज्य कमजोर बनेको अवस्थामा नेपाली सेनाको भूमिका र संख्या कटौतिका बारेमा बहस हुनु दुःखद पक्ष हो।’ सामाजिक सञ्जालमार्फत उनले भने,‘नेपाली सेनाको संख्या राष्ट्रको सुरक्षासँग मात्र होइन अन्तर्राष्ट्रिय शान्ति मिसनसँग पनि जोडिएको विषय हो।’
महासचिव पोखरेलले नेपाल सरकारले नेपाली सेनालाई आन्तरिक सुरक्षाका साथै विकास र विपद्को समयमा समेत प्रभावकारी रुपमा परिचालन गर्ने गरेको बताए। मुलुकलाई राजनीतिक अस्थिरता र सामाजिक अराजकताको दुश्चक्रमा पारेर सार्वभौमसत्तालाई नै आघात पुर्याउने कुप्रयास भइरहेका बेलामा सेना औचित्यका बारेमा अनावश्यक रुपमा बहस हुनु दुःखद पक्ष भएको उनको भनाई छ।
‘निश्चयनै अन्य संस्थाजस्तै नेपाली सेनामा पनि समयानुकुल सुधार गर्नु र त्यसको व्यावसायिक दक्षतामा अभिवृद्धिगर्नु आवश्यक छ। तर मुलुकलाई राजनीतिक अस्थिरता र सामाजिक अराजकताको दुश्चक्रमा पारेर सार्वभौमसत्तालाई नै आघात पुर्याउने कुप्रयास भइरहेका वेलामा नेपाली सेनाको भूमिका र यसको औचित्यका वारेमा अनावश्यक रुपमा बहसहुनु दुःखद पक्ष हो।’ उनले भने,‘नेपाल राष्ट्र र नेपाली जनताको हितका लागि नेपाली सेनाको गौरवपूर्ण भूमिकाको अभिवृद्धि नै हामी सबैको सरोकारको विषय हो र हुनुपर्दछ।’
प्रतिक्रिया दिनुहोस !
