उद्योग वाणिज्य संघको आह्वानमा जलेश्वर बन्द

जलेश्वर (महोत्तरी): महोत्तरीको सदरमुकाम जलेश्वर उद्योग वाणिज्य संघको नेतृत्वमा आज बन्द गरिएको छ । मिटरब्याज पीडितहरुले सोमबार निकालेको विरोध जुलुसको क्रममा जलेश्वरका व्यवसायीलाई सडकमै दुर्वव्यवहार र कुटपिट गरेको भन्दै आज जलेश्वर बजार बन्द गराएका हुन् । 

बन्दका कारण नगरभरिको निजी तथा सामुदायिक विद्यालय, पसल, बजार बन्द गरेर व्यपारीले आन्दोलन सुरु गरेका छन् । मिटरब्याज पीडितहरुले सरकारले ल्याएको ऐनमा संसोधनको माग गर्दै हिजो जलेश्वरमा प्रर्दशन गरेका थिए । प्रर्दशन गरिरहेका बेला आन्दोलनकर्मीहरुले व्यवसायीलाई कुटपिट गरेको भन्दै व्यपारीहरु सडकमा उत्रेका हुन् । 

मिटरब्याज पीडितको नाममा अराजक गतिविधि गर्नेहरुलाई कारवाही नहुन्जेलसम्म बजार बन्द यथावत राख्ने जलेश्वर उद्योग वाणिज्य संघका अध्यक्ष लभराजा सिँहले बताए।

जलेश्वर बजार बन्दका कारण सर्वसाधारणको जनजीवन कष्टकर बनेको छ । यता व्यपारीहरुले चौक–चौकमा नारबाजी गरेर दोषीलाई कारवाहीको माग गर्दै प्रदर्शन गरिरहेका छन्। 

जिल्ला प्रहरी कार्यालय महोत्तरीले कुनै अप्रिय घटना नहोस् भनेर व्यापक रुपमा सुरक्षाकर्मी परिचालन गरेको छ । मिटरब्याज पीडितहरुले भने आन्दोलन बिथोल्नलाई आफूहरुमाथि गलत आरोप लगाएर पीडकको समर्थनमा उत्रेका आरोप लगाएका छन्।