समुदायमा कांग्रेस अभियान
काठमाडौं : कांग्रेसले माघ १३ देखि २६ सम्म समुदायमा कांग्रेस अभियान चलाउने भएको छ । जनताको तीनै तहका सरकारसँगका गुनासा, सुझाव, अपेक्षा सुन्ने उद्देश्यले अभियान चलाउन लागेको कांग्रेसले जनाएको छ ।
पार्टीको केन्द्रीय कार्यसमितिले यसअघि भदौ १० देखि २४ गतेसम्मका लागि यो कार्यक्रम तय गरेको थियो । त्यतिबेला बर्खाका कारण सबै स्थानमा पुग्न समस्या हुने भन्दै कार्यक्रम सारेको थियो । त्यसपछि कांग्रेसले पुस १६ गतेदेखि माघ १६ गतेसम्मको मिति तोकेको थियो ।
अभियान प्रत्येक प्रदेशमा केन्द्रीय पदाधिकारी, पूर्वपदाधिकारी सँगै पार्टीका अन्य नेताले अभियानको प्रादेशिक समन्वय, अनुगमन र संयोजन गर्ने भएका छन् । संविधानको भावनाअनुसार समुदायबीचको सद्भाव र सम्बन्ध प्रगाढ बनाउने गरी ‘जनसंवाद र छलफल’ गर्ने तयारी भएको प्रचारविभाग प्रमुख मीन विश्वकर्माले जानकारी दिए ।
उनले केन्द्रीय सदस्य, प्रत्येक प्रदेशका एक–एक जना उपसभापति र महामन्त्री उक्त अभियानमा रहने जानकारी दिए । प्रदेश सभापतिले सबै अभियानको समन्वय गर्ने कार्यतालिका तय भएको छ । ७७ वटै जिल्लामा अभियानको संयोजन र सहजीकरण गर्न केन्द्रीय प्रतिनिधि रहने कांग्रेसले जारी गरेको परिपत्रमा उल्लेख छ । केन्द्रीय प्रतिनिधिले नै जिल्लाभित्रका सबै स्थानीय तहसँग समन्वय गरी अभियान अवधिभर जिल्लामा रही जिल्लामा हुने सबै कामको इन्चार्जका रूपमा काम गर्नुपर्ने उल्लेख छ ।
अभियानको उद्देश्य जनताका गुनासा सुन्ने र सल्लाह र सुझाव समेट्ने रहेको छ।
मीन विश्वकर्मा, प्रचार विभाग प्रमुख, नेपाली कांग्रेस
विश्वकर्माका अनुसार माघ १३ र १४ गतेसम्म सबै जिल्लामा केन्द्रीय प्रतिनिधि पुगिसक्ने बताए । उनका अनुसार केन्द्रीय प्रतिनिधि जिल्ला पुगेर कार्यसमितिको विस्तारित बैठक अभियानको उद्देश्यका बारेमा जानकारी दिने र प्रत्येक वडाका लागि प्रतिनिधि खटाउने, अभिमुखीकरण दिने, कार्यक्रम र कार्यतालिका तय गर्नेछन् ।
माघ १५ गते सम्बन्धित वडा कार्यसमितिको बैठक राख्नुपर्ने र १६ गते सहिद दिवसको दिन ६ हजार ७ सय ४३ वटै वडामा समुदायमा कांग्रेस अभियानको प्रारम्भ हुने भनिएको छ । १६ देखि २४ सम्म वडा तहमा समुदायमा कांग्रेस अभियानका विभिन्न कार्यक्रम सञ्चालन गर्ने कार्यतालिका छ । २६ गते सुशील कोइराला स्मृति दिवसका दिन सबै जिल्लामा अभियानको पहिलो चरणको अभियान सकिने बताइएको छ । महासमितिको बैठकपछि दोस्रो चरणको अभियान लैजाने कांग्रेसको तयारी छ ।
- जनताबाट प्राप्त सुझावलाई तत्–तत् तहका सरकारमा पुर्याउने, सरकारमा रहेका ठाउँमा कार्यक्रममा समावेश गरी कार्यान्वयनमा अग्रसरता लिने । पार्टी प्रतिपक्षमा रहेका ठाउँमा पार्टीको तर्फबाट समाधानका लागि पहलकदमी लिने ।
- स्थानीय स्तरमा सेवा प्रवाहको अवस्था, विकास निर्माण, समुदायस्तरमा भएका सकारात्मक प्रयास, उपलब्धि र अभ्यासको अवलोकन गर्ने ।
- असल अभ्यास सिक्ने । राम्रा पक्षको ग्रहण र सुधार गर्नुपर्ने विषयमा नीतिगत रूपमा पहलकदमी लिने ।
- जनताबाट आएका सुझावको संकलन र विश्लेषण गरी स्थानीय स्तरबाट टुंग्याउन सकिने विषयको सम्बोधनका लागि पार्टीको तर्फबाट पहलकदमी लिने/सुनिश्चित गर्ने । सरकारसँग समन्वय गर्ने । पार्टीको नीति निर्माणमा नीतिगत मार्गदर्शनका रूपमा लिने ।
- जनताका सुझाव बमोजिम स्थानीय स्तरमा गर्नुपर्ने सुधार गर्ने, गराउने र अन्य पार्टीका नीति तथा कार्यक्रममा समावेश गर्ने विषयलाई अभिलेखिकरण गरी केन्द्रमा बुझाउने
महामन्त्री थापाको संवाद यात्रा
महामन्त्री गगन थापा मेची–महाकाली संवाद यात्रामा निस्कने भएका छन् । पार्टीका कार्यकर्ता र जनताका गुनासा र सुझाव लिन महामन्त्री थापाले संवाद यात्रा गर्न लागेका हुन् ।
थापाले माघ १३ गतेदेखि झापाको भद्रपुरस्थित मेची पुलबाट संवाद यात्रा सुरु गर्ने बताए । संवाद यात्रामा जनताका कुरा मात्र सुन्ने, आफ्ना कुरा भन्ने तयारी थापाले गरेका छन् ।
पार्टीले माघ १२ गतेदेखि २६ गतेसम्म गर्ने ‘समुदायमा कांग्रेस’ अभियान सञ्चालन गर्दै छ । महामन्त्री थापाले पार्टीले गर्ने कार्यक्रमसँगै संवाद यात्रा थालनी गर्न लागेका हुन् ।
संवाद यात्राका लागि महामन्त्री थापा झापा, मोरङ, सुनसरी, सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, चितवन, नवलपुर, नवलपरासी, रूपन्देही, कपिलवस्तु, दाङ, बाँके, बर्दिया, कैलाली र कञ्चनपुर पुग्ने कार्यक्रम तय भएको छ । यात्रा २६ गतेसम्म हुनेछ ।