सर्लाहीमा दुर्घटनामा घाइते भएका एकजनाको मृत्यु
![सर्लाहीमा दुर्घटनामा घाइते भएका एकजनाको मृत्यु](https://annapurnapost.prixacdn.net/media/albums/accident_WzxIaPlQEO_Fa34M27uB6.jpg)
मलङ्गवा : सर्लाहीको मलङ्गवा नगरपालिका वडा न ११ गम्हरिया स्थित मलङ्गवा नवलपुर सडक खण्डमा सोमबार राती सवारी दुर्घटनामा परी घाइते भएका ११ जनामध्ये एकजनाको मृत्यु भएको छ । अन्य ३ जना घाइतेको अवस्था गम्भीर रहेको प्रहरीले जनाएको छ।
मृत्यु हुनेमा कार्यालय सहयोगी बिनोद घिमिरे रहेका प्रहरी नायब उपरीक्षक दिपेन्द्र पन्जियारले जानकारी दिए। मलङ्गवाबाट नवलपुरतर्फ जाँदै गरेको उखु बोकेका ज.२ त १०६७ नम्बरको ट्याक्टरमा सोही दिशाबाट जाँदै गरेको बी आर ०६ पी डी ९६४८ नम्बरको सफारीले ठक्कर दिंदा दुर्घटना भएको हो । घाइते सबैजना सफारीमा सवार थिए ।
दुर्घटनामा परी गम्भीर घाइते हुनेमा नापी कार्यालय प्रमुख ४५ वर्षीय संजय मान्नधर, ३० वर्षीय बैजु यादव र ३५ वर्षीय रामलाल साह रहेका छन्। घाइतेहरुमा २४ वर्षीय संजित यादव, ३० वर्षीय रिटेन यादव, ५० वर्षीय बैधनाथ पटेल, ३४ वर्षीय रामबाबु यादव, २९ वर्षीय दिपेन्द्र यादव, २४ वर्षीय सहिद अनवर र २५ वर्षीय अजय यादव रहेका छन्।
रिटेन यादवबाहेक सबै घाइतेहरुलाई प्रदेशिक अस्पताल मलङ्वामा समान्य उपचार पश्चात् थप उपचारका लागि बीरगन्जतर्फ पठाइएको जिल्ला प्रहरी कार्यालय सर्लाहीले जनाएको छ । सवारी साधन अहिले घटना स्थलमै रहेको छ । ट्याक्टर चालक फरार रहेका छ्न्।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)