विराटनगर : मोरङका अलगअलग स्थानमा सोमबार राति आगलागी हुँदा ८० लाखभन्दा बढीको क्षति भएको छ। सुनवर्षी र कानेपोखरीका दुईवटा घरमा आगलागी भएको हो।
सुनवर्षी नगरपालिका–१ कालाबन्जारस्थित आशिष थापाको घरमा राति ८:३० बजेतिर आगलागी हुँदा ५० लाख बराबरको क्षति भएको छ। आगोले घरसहित घरमा रहेको ३ लाख नगद, ४ तोला सुन, अन्नपात, लत्ताकपडा, फर्निचरका सामानलगायत जलेर ध्वस्त भएको प्रहरीले जनाएको छ। आगोले २ तले पक्की घर पूर्णरूपमा जलेको छ।
घटनामा मानवीय र चौपाया क्षति भने भएन। इलाका प्रहरी कार्यालय रंगेलीबाट खटिएको इन्सपेक्टर बुद्धिराम चौलागाईं नेतृत्वको टोलीले दमकल र स्थानीयको सहयोगमा आगो नियन्त्रणमा लिएको थियो। विद्युत सर्ट हुँदा आगलागी भएको हुनसक्ने प्रहरीको अनुमान छ।
त्यस्तै, कानेपोखरी गाउँपालिका–२ बहत्तरबिघेस्थित अर्जुन विष्टको घरमा राति ११:५५ बजेतिर आगलागी भएको छ। आगोले ४ कोठे पक्की घरसहित लत्ताकपडा, काठपात, ६ तोला सुन, १८ हजार नगद, ६५ मन धान, ग्वाली, एउटा खसी र ६ वटा बाख्रा जलेको छ।
आगालागीमा ३१ लाख १८ हजार बराबरको क्षति भएको इलाका प्रहरी कार्यालय पथरीका डीएसपी गणेश श्रेष्ठले जानकारी दिए। उनका अनुसार आगलागीमा २० लाख बराबरको घर, ७ लाखको सुन, १ लाखको धान, ३ लाखको ग्वाली तथा ३० हजार बराबरको खसीबाख्रा जलेको पाइएको छ।
प्रहरीले दमकल र स्थानीयको सहयोगमा आगो नियन्त्रणमा लिएको थियो। विद्युत सर्ट भएर आगलागी भएको हुनसक्ने प्रहरीको अनुमान छ।
प्रतिक्रिया दिनुहोस !
