आपतमा परेका नागरिकलाई गाउँपालिकाको मलम : नि:शुल्क बस सेवाबाट गाउँ ल्याउँदै आँबुखैरेनी

गोरखा : दशैँका बेला काठमाडौँबाट घर फर्कने क्रममा सवारी साधन नपाएर हैरानी खेपिरहेका आफ्ना नागरिकहरूका लागि आँबुखैरेनी गाउँपालिकाले नि:शुल्क बस सेवा सञ्चालन गरेको छ । चाडबाडका बेला घर फर्कन चाहने पालिकाबासीहरूका लागि शनिबारदेखि नि:शुल्क बस सेवा सञ्चालन गरेको पालिकाले जनाएको छ । 

आँबुखैरेनी गाउँपालिका स्थायी घर भइ रोजगारी एवं पढाइको सिलसिलामा काठमाडौं बसोबास गर्दै आएका आफ्ना नागरिहरूका लागि नि:शुल्क बस सेवा सञ्चालन गरिएको आँबुखैरेनी गाउँपालिका वडा नं–३ का वडाअध्यक्ष दिनेश केसीले बताए । पालिकाको आर्थिक सहयोग तथा आँबुखैरेनी समाज काठमाडौंको समन्वयमा बस सेवा सञ्चालन गरिएको उनले जानकारी दिए । 

काठमाडौंमा गाडी नपाएर तथा महंगो भाडाको मारमा परेका यात्रुलाई गाउँपालिकाले बसको व्यवस्था मिलाउँदा धेरै राहत महशुस स्थानीयले बताएका छन्।  ‘पालिकाले आँबुखैरेनी समाजका अध्यक्ष, सचिव र कोषाध्यक्षको नम्बर आफ्नो वेबसाइटमा राखिदिएको छ ।

काठमाडौं बसोबास गर्दै आएका पालिकाबासीहरूले वेबसाइटमार्फत उहाँहरूलाई वा पालिकामा सम्पर्क गरेर नि:शुल्क बस सेवा प्राप्त गर्न सक्नुहुन्छ’, उनले भने,‘नि:शुल्क बस सेवा अब दुई दिन (असोज २२ र २३) गतेसम्म मात्र सञ्चालन हुनेछ। बसले काठमाडौँको सामाखुसीदेखि पालिका भवनसम्म नि:शुल्क सेवा दिनेछ ।’

नि:शुल्क बस सेवाको पहिलो दिन शनिबार ४३ जना पालिकाबासीहरूले सेवा लिएको उनले बताए। ‘पहिलो दिन ८० प्रतिशत विद्यार्थीहरू थिए,अन्य रोजगारीका लागि काठमाडौं बसेकाहरूले पनि सम्पर्क गरिरहेको भन्ने सुनेको छु,'उनले भने ।

 नि:शुल्क बस सेवा कार्यक्रमका लागि करिब १ लाख खर्च हुने अनुमान पालिकाको छ ।