पोखरा : पोखराको आकाशमा हुँदै आएको साहसिक खेल प्याराग्लाइडिङ पहिलेकै ठाउँमा फर्केको छ । पोखरा अन्तर्राष्ट्रिय विमानस्थल सञ्चालनमा आउनु अघिदेखि उडान र अवतरणको स्थान पहिले भइरहेको ठाउँभन्दा करिब ५ किलोमिटर पर मान्दे्रढुंगा र पामेमा सारिएको थियो । अब फेवाताल माथिको आकाशमा कावा खाँदै ताल किनार चंखपुर र खपौदीमा अवतरण गर्न पाइने भएको छ । प्याराग्लाइडिङका कम्पनीहरूको छाता संगठन नेपाल हवाई खेलकुद संस्थाले सुरुदेखि नै अन्तर्राष्ट्रिय अभ्यास र सुरक्षाका दृष्टिले पुरानै ठाउँबाट उडान र अवतरण गर्दा कुनै फरक नपर्ने बताउँदै आएका थिए । बिभिन्न देशमै पुगेर यस विषयमा अध्ययनसमेत गरेर टोलीले बारम्बार नेपाल नागरिक उड्डयन प्राधिकरण (क्यान) लाई सुझाएको थियो ।
उडानको स्थान भने तोरीपानी र मान्द्रढुंगाबाटै हुने क्यानका अधिकारीले बताएका छन् । त्यसैकारण, प्राधिकरणले पुरानै ठाउँबाट उडान भर्न र अवतरण गर्न अनुमति दिएको हो । क्यानले पोखरामा प्याराग्लाइडिङ गर्ने उडानको तालिकामा समेत समय थपेको छ । यसअघि दिउँसो ३ बजेसम्म मात्र उडान भर्न पाइनेमा समय थपेर ४ः३० सम्म उडान भर्न पाइने गरी अनुमति दिइएको नेपाल हवाई खेलकुद संस्थाका अध्यक्ष अनिल केसीले बताए ।
पुरानै ठाउँबाट अवतरण गर्ने अनुमति र समय थप भएसँगै प्याराग्लाइडिङ व्यवसायीहरूको संस्था नेपाल हवाई खेलकुद संस्था र पाइलट क्लबले संयुक्त रूपमा प्यारापाइलटहरूलाई बुधबार नयाँ एयरस्पेस र सुरक्षाका बारेमा अभिमुखीकरण कार्यक्रम पनि गरेका छन् ।
प्याराग्लाइडिङ उडान र अवतरण पहिलेको भन्दा करिब ५ किलोमिटर पर सर्दा व्यवसायमा पनि असर गरेको व्यवसायीले बताउँदै आएका थिए । फेवातालको आकाशमा प्यारा उडेको देखेर नै पोखरामा आउने पर्यटकले प्याराग्लाइडिङ उडानका बारेमा थाहा पाउने र उडानका लागि बुकिङ गर्थे ।
पुन पहिलेकै ठाउँमा सरेपछि व्यवसाय पहिलेकै लयमा फर्कने विश्वास नेपाल हवाई खेलकुद संस्थाका पूर्वअध्यक्ष योगेशबहादुर भट्टराईले गरे । पोखरा महानगरपालिकाका मेयर धनराज आचार्यले प्याराग्लाईडिङ पुरानै ठाउँमा सार्दा पोखराको शाहासिक खेल पुनः लयमा फर्कने भन्दै खुसी व्यक्त गरे ।
पोखरा अन्तर्राष्ट्रिय विमानस्थलका एटीसी प्रमुख योगेन्द्र कुँवरले क्यानसँगको छलफल र धेरै अध्ययनपश्चात् ताल किनार खापौदीमा प्याराग्लाइडिङ अवतरणको अनुमति प्राप्त भएको बताए । प्याराग्लाइडिङ उडानका क्रममा सुरक्षाको विषयमा कुनै सम्झौता नहुने भन्दै सुरक्षालाई पहिलो प्राथमिकतामा राख्नुपर्ने उनले बताए ।
प्याराग्लाइडिङको एकल उडान रोकीएको विषयमा पनि अध्ययन भइरहेको र अध्ययनपश्चात पुनर्निणर्यमा पुगिने एटीसी प्रमुख कुँवरले जनाए ।
पोखरा भ्रमण वर्ष २०२५ का संयोजक तथा पोखरा पर्यटन परिषदका पूर्वअध्यक्ष गोपीबहादुर भट्टराईले प्याराग्लाईडिङ पोखराको पर्यटन उद्योगमा महत्वपूर्ण पक्ष रहेकोले यसलाई प्रबद्र्धन गर्नुपर्नेमा जोड दिए ।
पोखरा पर्यटन परिषदका अध्यक्ष तारानाथ पहारीले एकल उडान नहुँदा पोखरामा एक्लै उडान भर्न आउने सयौं पर्यटक आउन रोकीएको भन्दै पुनः एकल उडानको अनुमति दिन अनुरोध गरे ।
पोखरामा हाल ५७ वटा प्याराग्लाइडिङ कम्पनी सञ्चालनमा छन् । पोखराको प्याराग्लाईडिङ व्यवसायमा करिब एक अर्व लागेको नेपाल हवाई खेलकुद संस्थाका पूर्व अध्यक्ष योगश भट्टराईले बताए । प्याराग्लाईडिङ व्यवसायमा २७० जना प्यारापाइलटले रोजगारी पाएको पनि उनले बताए । यति धेरै लगानी र रोजगार दिएको प्याराग्लाइडिङ व्यवसायलाई राज्यले प्रबद्र्धन र विकासमा सहयोग गर्नुपर्ने व्यवसायीको भनाइ छ ।
प्रतिक्रिया दिनुहोस !
