महेन्द्रनगर : शुक्रबार राति कञ्चनपुरको बेदकोट–७ सुडाका शेरसिंह सार्कीकी १६ वर्षीया छोरी घरको छतबाट लडेर घाइते भइन् ।
उनले राति नै छोरीलाई महाकाली प्रादेशिक अस्पताल महेन्द्रनगर लगे । आकस्मिक कक्षमा भर्ना गरियो । तर, चिकित्सकले थप उपचार सम्भव नभएको भन्दै अन्यत्र लैजान सार्कीकी छोरीलाई रेफर गरिदिए । त्यति बेलासम्म रातको १ बजिसकेको थियो । चिकित्सकले रेफर गरेपछि धनगढी लैजान सार्की एम्बुलेन्स खोज्न थाले । तर, एम्बुलेन्स पाएनन् ।
‘डाक्टरले रेफर गरेपछि मैले अस्पतालमा उपलब्ध भएका करिब १० वटा एम्बुलेन्सलाई फोन गरेँ’, सार्कीले भने, ‘कसैले पनि आउन मानेनन् । कसैले म आउन सक्दिनँ भने त कसैले मेरो समय छैन भने ।’ उनले एम्बुलेन्सका लागि थुप्रै पटक प्रयास गर्दासमेत एम्बुलेन्स पाउन नसकेको गुनासो पोखे । ‘छोरीको पेट धेरै नै दुखेको थियो, अस्पतालले रेफर गरिदियो । अन्त जान एम्बुलेन्स पाइएन । त्यो दिन धेरै दुःख पाइयो’, उनले दुखेसो पोख्दै भने, ‘हामीले फोन गर्दा एम्बुलेन्स नआएपछि अस्पतालमा रहेको प्रहरीलाई भन्यांै । प्रहरीले फोन गर्दा पनि एम्बुलेन्स आउन मानेनन् ।’
करिब डेढ घण्टापछि प्रहरीको सहयोगमा बेदकोट नगरपालिकाको एम्बुलेन्स आयो । त्यति बेलासम्म रातिको साढे तीन बजेको सार्कीले बताए । ‘प्रहरीको सहयोगमा एम्बुलेन्स पाएपछि उपचारका लागि धनगढी गयौं’, उनले भने, ‘धन्न छोरीलाई केही भएन । नत्र त एम्बुलेन्स नपाएरै मान्छेको ज्यान तलमाथि हुन सक्छ ।’
अस्पताल स्रोतका अनुसार रातिको समयमा एम्बुलेन्सहरू बिरामी बोक्न मान्दैनन् । सोही दिन एकजना अर्का बिरामीसमेत एम्बुलेन्स नपाएर समस्यामा परेको अस्पताल स्रोतको दाबी छ । ‘यहाँबाट रेफर भएपछि बिरामीका आफन्तले एम्बुलेन्सलाई फोन गरे तर आउन मानेनन्’, अस्पताल स्रोतले भन्यो, ‘प्रहरीले फोन गर्दा पनि धेरैले फोन उठाएनन् । फोन उठाएकाहरूले पनि आउन मानेनन् ।’
अस्पताल स्रोतका अनुसार बिरामीका आफन्तले फोन गर्दा प्रहरीको गाडी बोलाउन र आइन्दा आपूmलाई फोन नगर्न भन्दै एम्बुलेन्स चालकले उल्टै धम्की दिने गरेका छन् । भीमदत्त नगरपालिकामा सञ्चालनमा रहेका एम्बुलेन्सहरूले बिरामी बोक्न नमानेपछि बेदकोट नगरपालिकाबाट एम्बुलेन्स बोलाएर बिरामी ओसारपोसार गर्नु परेको महाकाली अस्पताल स्रोतको भनाइ छ ।
एम्बुलेन्स सञ्चालक संस्था र चालक यसप्रति जिम्मेवार नहुँदा बिरामीले सास्ती खेप्नुपरेको छ । जिल्ला स्वास्थ्य कार्यालय कञ्चनपुरका अनुसार भीमदत्त नगरपालिकामा विभिन्न संघ, संस्थाका १६ वटा एम्बुलेन्स सञ्चालनमा छन् । स्वास्थ्य कार्यालयका अनुसार जिल्लामा ४४ वटा एम्बुलेन्सहरू सञ्चालनमा छन् ।
प्रमुख जिल्ला अधिकारीको अध्यक्षता र स्वास्थ्य कार्यालय प्रमुख सदस्य सचिव रहने गरी जिल्ला एम्बुलेन्स व्यवस्थापन समिति रहेको छ । कञ्चनपुर प्रमुख जिल्ला अधिकारी लक्ष्मण ढकालले एम्बुलेन्स चालकले बिरामी बोक्दिनँ भनेर भन्न नपाइने बताए । ‘एम्बुलेन्स भनेको विशिष्टीकृत सेवा हो । चालकले जान्न भन्न पाउँदैनन्’, प्रजिअ ढकालले भने, ‘छिट्टै बैठक बोलाएर यसको समाधानमा लाग्छौं ।’ महाकाली अस्पतालका दुइटा एम्बुलेन्स छन् । ती दुवै एम्बुलेन्स बिग्रिएर थन्किएका छन् ।
प्रतिक्रिया दिनुहोस !
