काठमाडौं : राष्ट्रिय सूचना आयोगले सूचनाको हकको सहज उपयोगका लागि डिजिटल प्लेटफर्म सार्वजनिक गरेको छ । आयोगले बिहीबार काठमाडौंमा पत्रकार सम्मेलन गर्दै सूचनाको हकको सहज उपयोगका साथै सार्वजनिक निकायमा भएका काम कारवाहीका सूचनालाई डिजिटल प्लेटफर्ममार्फत उपलब्ध गराउन आरटीआई मेनेजमेन्ट सिस्टम सार्वजनिक गरेको हो ।
सो व्यवस्था अनुसार पहिलो चरणमा संघीय सरकारका मन्त्रालयहरू,संवैधानिक तथा केन्द्रीय आयोग, विभाग वा विभागस्तरका कार्यालयहरूलाई अनलाइन प्रणालीमार्फत सूचना माग गर्ने,सूचना उपलब्ध नगराए पुनरावेदन समेत गर्न सकिने आयोगले जनाएको छ ।
यसलाई तीनै तहका सरकार र देशव्यापीरुपमा क्रमश लागू गर्ने योजना रहेको आयोगका प्रमुख सूचना आयुक्त डा. सुरेशप्रसाद आचार्यले जानकारी दिए । उनले डिजिटल प्लेटफर्ममार्फत सहज रुपमा सूचनाको हक प्रयोग गर्न सकिने र विभिन्न निकायमाथि हुने गरेको गुनासोको समेत यसैमार्फत् जानकारी गराउन सकिने बताए।
आयोगले जेठ २५ देखि असार मसान्तसम्मको अवधिमा २३ वटा मुद्दा दर्ता भएको र जवाफ दिन नपर्नाको कारण भए जवाफ पेश गर्न २४ वटा आदेश भएको जानकारी दिएको छ । त्यस्तै आर्थिक वर्ष २०८१/८२ को एक वर्षभित्र कूल १ हजार ५३ वटा मुद्दा दर्ता भएको र त्यसमध्ये ९८५ वटा आदेश गरिएको आयोगले जनाएको छ ।
प्रतिक्रिया दिनुहोस !
