सुर्खेत : देशलाई पूर्व–पश्चिम जोड्ने मदन भण्डारी राजमार्गको सुर्खेत खण्डमा एकपछि अर्को विवाद उत्पन्न हुन थालेका छन् । विवादकै कारण राजमार्गको काममा अवरोध भइरहेको छ । बारम्बार उत्पन्न हुने विवादले यो राजमार्गअन्तर्गत सुर्खेतको पश्चिम खण्डको काममा ढिलाइ भइरहेको हो ।
सुर्खेतको पश्चिम क्षेत्रका नागरिक भरपर्दो सडक नहुँदा वर्षौंदेखि सास्ती भोग्न बाध्य छन् । तर मदन भण्डारी राजमार्गले समेट्ने भएपछि यहाँका नागरिक उत्साहित थिए । तर स्तरोन्नति भएर कालोपत्रे सडकमा यात्रा गर्ने पश्चिम क्षेत्रका नागरिकको रहर पूरा हुन अझै समय लाग्ने देखिन्छ । कारण यही खण्डमा नै राजमार्गको स्तरोन्नतिको काममा सुरुवातदेखि नै विभिन्न विवाद उत्पन्न भइरहेका छन् । बारम्बार आउने विवादले पश्चिम खण्डको काममा ढिलाइ भइरहेको मदन भण्डारी राजमार्ग आयोजना कार्यालय सुर्खेतले जनाएको छ ।
यो राजमार्गको पश्चिम खण्डमा डीपीआर चरणमै विवाद भएको थियो । वराहताल र पञ्चपुरीमा स्थानीयले डीपीआर चरणमै अवरोध गरेपछि काम प्रभावित भएको थियो । वराहतालको बड्डीचौर र पञ्चपुरीको बराइँचे तथा दुलालथाईमा स्थानीयले राजमार्गको सर्वे नै गर्न दिएनन् । राजमार्गको दायाँबायाँ सडक छाड्ने विषयमा स्थानीयले असहमति जनाउँदै काममा अवरोध गरेका थिए । अन्ततः लामो प्रयासपछि यो विवाद भने समाधान भयो । तर यही खण्डमा अर्को विवाद सुरु भयो । बड्डीचौरदेखि खम्बागाडेसम्मको खण्डमा सडकमा रहेका रुख हटाउने विवादले काम नै रोकियो । रुख काट्ने अनुमति नपाउँदा तीन वर्षसम्म यो खण्डको काम नै हुन पाएन ।
यद्यपि हालै यो खण्डमा रुख कटानको सम्झौता भएको छ । अब रुट कटानको प्रक्रिया अगाडि बढेको छ । तर तीन वर्षसम्म रुख कटानको अनुमति नपाउँदा राजमार्गको यो खण्डमा काम नै रोकियो । यसले पनि राजमार्ग निर्माणमा ढिलाइ हुन पुग्यो । पछिल्लो पटक आएर पश्चिम खण्डकै विभिन्न तीन स्थानमा विवाद उत्पन्न भएको छ । विवादका कारण राजमार्गको काममा अवरोध भइरहेको आयोजनाले जनाएको छ । आयोजना कार्यालयका अनुसार राजमार्गअन्तर्गत पश्चिम खण्डमा पर्ने गुटु, बिजौरा र लगाममा विवाद देखिएको छ । विवादका कारण गुटु र बिजौरामा काम नै हुन सकेको छैन । लगाम हुँदै डोटी जोड्ने खण्डमा भने स्थानीयले आयोजनाको डीपीआरभन्दा अन्यत्रबाट राजमार्ग लैजानुपर्ने माग अगाडि सारेका छन् । यो खण्डमा पनि सडक निर्माण गर्दा विवाद पेचिलो हुने देखिन्छ ।
आयोजनाले १२ मिटर चौडाइमा सडक निर्माण गरिरहेको छ । तर गुटु खण्डमा भने राजमार्गको चौडाइ ३० मिटर हुनुपर्ने माग स्थानीय जनप्रतिनिधिले गरेका छन् । यही विवादका कारण यहाँ काम अगाडि बढ्न सकेको छैन । मदन भण्डारी राजमार्ग कार्यालय सुर्खेतका इन्जिनियर रेशम वली भन्छन्, ‘गुटुमा स्थानीयले बजार क्षेत्र भएकाले फोरलेन सडक चाहियो भन्छन्, जनप्रतिनिधिको माग राजमार्गको चौडाइ ३० मिटर हुनुपर्छ भन्ने छ । तर हामीले डीपीआरबमोजिम काम गर्नुपर्नेहुन्छ, यही विषय टुंगो नलाग्दा गुटुमा काम प्रभावित भइरहेको छ ।’ यस्तै गुटु–बल्दे खण्डको बिजौरामा पनि स्थानीयले अवरोध गरेका छन् । यहीकारण यो खण्डमा आयोजनाले काम गर्न सकिरहेको छैन ।
बिजौराको अस्पताल चौकदेखि बिजौरा बजार हुँदै डुङखोला सम्मको झन्डै १५ सय मिटरमा विवाद छ । डीपीआरमा अस्पताल चौकदेखि बिजौरा बजार हुँदै सडक डुङखोलासम्म जोड्ने उल्लेख छ । डीपीआर निर्माणको क्रममा कुनै अवरोध नगरेका स्थानीयले अहिले निर्माणमा अवरोध गरिरहेका हुन् । डीपीआरअनुसार सडक निर्माण गर्दा बिजौरा बजार नै विस्थापित हुने अवस्था आएपछि विवाद सुरु भएको स्थानीयको भनाइ छ ।
डीपीआरअनुसार सडक निर्माण भएमा आफूहरू विस्थापित हुने भन्दै स्थानीयले राजमार्गलाई अन्यत्रबाट घुमाएर लैजानुपर्ने अडान राखेका छन् । तर राजमार्ग कार्यालयले राष्ट्रिय राजमार्ग घुमाउनुभन्दा जति सक्यो छोटो मार्ग हुनेगरी निर्माण हुनुपर्ने बताउँदै आएको छ । यो स्थानमा भइरहेको अवरोध हटाउन थुप्रै सर्वपक्षीय छलफल पनि भए । तर हालसम्म पनि सहमति जुट्न नसकेको आयोजनाले जनाएको छ । विवादका कारण यो स्थानमा पनि काम रोकिएको छ । यस्तै विवादकैबीच पछिल्लो पटक आएर लगाम हुँदै डोटी जोड्ने करिब ३० किलोमिटर खण्डमा नयाँ विवाद सुरु भएको छ ।
यो खण्डमा स्थानीयले धामीसेनबाट बेनीघाट हुँदै राजमार्गलाई डोटीसम्म जोड्नुपर्ने माग राखेका छन् । यसरी लैजाँदा राजमार्गको लम्बाइ करिब ४६ किलोमिटर थपिन्छ । तर डीपीआरअनुसार राजमार्गलाई धामीसेनबाट पाल्पाघाट हुँदै डोटी लैजाँदा ८ किलोमिटर मात्र दूरी रहेको आयोजनाको भनाइ छ । यसकारण पनि राजमार्गलाई स्थानीयको मागअनुसार अगाडि बढाउन नसकिने आयोजनाले अडान लिएको छ । राजमार्गको दूरी जतिसक्यो छोटो हुनुपर्ने भन्दै डीपीआरबाहेक अन्यत्रबाट सडक लैजान नसकिने आयोजना कार्यालयका इन्जिनियर रेशम वलीले बताए ।
सुर्खेत पश्चिमको बड्डीचौरबाट मदन भण्डारी राजमार्ग लगामसम्म जोडिन्छ । यो खण्डमा राजमार्गको दूरी ८५ किलोमिटर छ । त्यहाँबाट अगाडिको खण्ड डोटीमा पर्दछ । यो राजमार्गअन्तर्गत सुर्खेतको पूर्वी खण्डमा भने काम अन्तिम चरणमा छ । यो खण्डमा अब केवल १६ सय मिटरमात्र कालोपत्रे हुन बाँकी छ । यो राजमार्गअन्तर्गत पूर्वी खण्डमा भेडाबारीदेखि धुलियाबिटसम्मको दूरी ३५ किलोमिटर सडक पर्दछ । यस्तै, यो खण्डमा पर्ने १२ वटामध्ये अब एउटामात्र पुल सञ्चालनमा आउन बाँकी रहेको छ । तर पश्चिम खण्डमा विवादका कारण बारम्बार काममा अवरोध हुने गरेको आयोजनाको भनाइ छ । यो राजमार्गअन्तर्गत सुर्खेतमा झन्डै १ सय ५८ किलोमिटर सडक पर्दछ ।
प्रतिक्रिया दिनुहोस !
