दैलेख : दैलेखमा १३ वर्षीया बालिकालाई लखेटी–लखेटी बलात्कार गरेको आरोपमा दुई जना युवक पक्राउ परेका छन् । २४ वर्षीय गोपेन्द्र शाही भन्ने गोबिन्द बहादुर शाही र २५ वर्षीय खगेन्द्र भण्डारीलाई प्रहरीले पक्राउ गरेको हो ।
चामुण्डाबिन्द्रासैनी नगरपालिकाकी ती बालिका यही साउन २२ गते राति तीजको नाच हेर्न गएर घर फर्किने क्रममा बलात्कृत भएकी हुन् । प्रहरीका अनुसार चामुण्डाबिन्द्रासैनी नगरपालिकाको स्थानीय माथिल्लो खाड़ास्थित सडक खण्डमा तीज पर्वको अवसरमा नाचगान कार्यक्रम आयोजना गरिएको थियो । कार्यक्रम हेरेर साथीहरूसँग घर फर्किने क्रममा मध्यराति ती बालिका बलात्कृत भएको जिल्ला प्रहरी कार्यालय दैलेखका प्रहरी निरीक्षक एवं सूचना अधिकारी लालबहादुर सुनारले जानकारी दिए ।
उनका अनुसार ती दुई युवकले पीडित बालिकाको पिछा गरी कुटपिटसमेत गरी घाइते बनाएर दुबै जनाले पालैपालो जबरजस्ती करणी गरेको थिए । सो घटनामा संलग्न कसुरदार दुबै जनालाई पक्राउ गरी प्रहरी कार्यालयको हिरासत कक्षमा राखि जिल्ला अदालत दैलेखबाट म्याद थप गरी थप अनुसन्धान भइरहेको प्रहरीको भनाई छ ।
प्रतिक्रिया दिनुहोस !
