हेटौंडा : बागमती प्रदेशका मुख्यमन्त्री इन्द्रबहादुर बानियाँले शुक्रबार ५ जना नयाँ मन्त्री नियुक्त गरे । मन्त्रिपरिषद् १४ सदस्यीय बन्यो । तर, पूर्वसहमतिअनुसार निवर्तमान मुख्यमन्त्री बहादुर सिं लामा पक्षलाई नसमेटेको भन्दै उनी पक्षधर नेताहरू असन्तुष्ट बनेका छन् ।
मुख्यमन्त्री बानियाँले मन्त्रिपरिषद्मा ‘भाग दिन्छु’ भनेर पार्टी सभापति शेरबहादुर देउवासँग गरेको सहमति कार्यान्ययन नभएको भन्दै लामा पक्षधर नेताहरूले आक्रोश पोखेका छन् । लामाले नियुक्त गरेका तीन मन्त्रीलाई बानियाँ नेतृत्वको मन्त्रिपरिषद्मा पुनः समेट्ने पूर्वसहमति कार्यान्वयन नगरेको लामा पक्षधर नेताहरूको आरोप छ ।
लामालाई संसदीय दलको नेता हटाउन बानियाँले अविश्वासको मत दर्ता गरेपछि लामाले तीनजना मन्त्री नियुक्त गरेका थिए । त्यस बेला धादिङका गोविन्द लम्साल, चितवनका माया श्रेष्ठ र गीता गुरुङलाई मन्त्रीमा नियुक्त गरी शपथ खुवाउने तयारीसमेत गरेका थिए । तर, लामा संसदीय दलको नेताबाट हटाइए । मुख्यमन्त्रीबाट राजीनामा दिनुपरेपछि मन्त्रीहरूले शपथ पनि खान पाएनन् । तीनै तीनजनालाई नयाँ मन्त्रिपरिषद्मा समेटने पूर्वसहमति तोडिएको लामा पक्षधरको आरोप छ ।
बागमतीमा मुख्यमन्त्री तथा मन्त्रिपरिषद्को कार्यालयसहित १४ मन्त्रालय छन् । जसमा सत्ता साझेदार एमालेको भागमा ६ र कांग्रेसको भागमा मुख्यमन्त्रीसहित ८ वटा मन्त्रालय परेका थिए । गत २० साउनमा मुख्यमन्त्रीमा नियुक्त बानियाँले सोही दिन एमालेका ६ र कांग्रेसका आफू पक्षधर दुईजनालाई मन्त्री नियुक्त गरेका थिए । ५ जना कांग्रेसका मन्त्री नियुक्त गर्न बाँकी थियो । मुख्यमन्त्री बानियाँले निवर्तमान मुख्यमन्त्री लामाले नियुक्त गरेका ३ जनालाई मन्त्रिपरिषद्मा लैजानुपर्नेमा ५ जना नै आफू पक्षधरका सांसदलाई मन्त्री बनाएको भन्दै लामा पक्षधरका नेता गोविन्द लम्सालले असन्तुष्टि व्यक्त गरे । उनले भने, ‘पार्टी केन्द्रीय सभापति शेरबहादुर देउवा दाइसँग बसेरै निवर्तमान मुख्यमन्त्रीबहादुर सिं लामाले नियुक्त गरेका ३ जनालाई मन्त्री बनाउने सहमति भएको थियो ।
देउवा दाइले हामीसँग गरेको सहमति कार्यान्वयन गराउनु भएन । विश्वासको मत प्रदान गर्ने दिन पनि तिमीहरूको माग पूरा हुन्छ, मतदान गर्न जाऊ भनेर देउवा दाइले फोन गरेर भन्नुभयो । त्यसलगत्तै पार्टी सभापतिको कुरा मानेर विश्वासको मत दिन गयांै र दियौं पनि । तर, अहिले आएर सहमतिविपरीत काम भयो ।’ उक्त दिन विश्वासको मत दिएपछि मुख्यमन्त्री बानियाँको पक्षमा ६३ मत परेको थियो ।
प्रस्तावको विपक्षमा २२ र तटस्थमा ७ मत मात्र पर्यो । त्यसपछि बानियाँ मुख्यमन्त्री बने । ‘मन्त्रिपरिषद् विस्तार गर्दा भने उहाँले हामीसँग कुनै पनि छलफल नै नगरी पूर्वसहमतिविपरीत पेलेरै ५ जना आफ्ना मन्त्री नियुक्त गर्नुभयो । पूर्वसहमतिमा नियुक्त भइसकेका ३ जना मन्त्रीलाई मन्त्रिपरिषद्मा समेट्ने भन्ने थियो । हाम्रो बटम लाइन नै यही रहेको थियो’, लम्सालले भने । संसदीय दलको नेताका लागि भएको निर्वाचनमा आफूलाई मतदान नगर्ने १४ सांसदमध्ये कसैलाई पनि मन्त्री नबनाएको उनले बताए ।
मुख्यमन्त्री बानियाँले नियुक्त गरेका ५ जना मन्त्रीहरूले शुक्रबार पद तथा गोपनीयताको शपथ लिएका छन् । नवनियुक्त मन्त्रीहरू प्रभात तामाङ, कञ्चनचन्द्र बादे, सुरेश श्रेष्ठ, उर्मिला केसी नेपाल र बिनु रायमाझीलाई प्रदेश प्रमुख दीपकप्रसाद देवकोटाले शपथ गराएका हुन् । मुख्यमन्त्री बानियाँले प्रभात तामाङलाई आर्थिक मामिला तथा योजना मन्त्रालय, कञ्चनचन्द्र वादेलाई सामाजिक विकास मन्त्रालय, सुरेश श्रेष्ठलाई संस्कृति तथा पर्यटन मन्त्रालय, उर्मिला नेपाललाई युवा तथा खेलकुद मन्त्रालय र बिना रायमाझी पौडेललाई सहकारी तथा गरिबी निवारण मन्त्रालयको जिम्मेवारी दिएका हुन् ।
प्रतिक्रिया दिनुहोस !
