सिमराः पर्सा राष्ट्रिय निकुञ्जको आधाभार जंगलबाट शुक्रबार बिहान बाघ नियन्त्रणमा लिइएको छ । पछिल्लो तीन महिनामा तीनजनाको ज्यान गएपछि खटिएको विज्ञ टोलीले डार्ट गरेर बाघ नियन्त्रणमा लिएको हो ।
बाघको आक्रमण नरोकिएपछि राष्ट्रिय प्रकृति संरक्षण कोष चितवन र जेडएसएलको विज्ञ टोली बाघ नियन्त्रणमाका लागि खटिएको थियो । पथलैया अमलेखगञ्ज सडकखण्ड अन्तर्गत आधाभार जंगलमा बाघ देखिएपछि विज्ञ टोली पुगेर डार्ट गरेको हो ।
हात्तीको सहायतामा जंगल पुगेको टोलीले डार्ट गरी बाघलाई बेहोस बनाएको थियो । बेहोस भएको बाघलाई निकुञ्जको कार्यालयस्थित खोरमा राखिएको जीतपुरसिमरा उपमहानगरपालिका वडा नम्बर २१ का वडाध्यक्ष सुवास श्रेष्ठले जानकारी दिएका छन् ।
बाघ नियन्त्रणमा लिन विज्ञ टोलीसहित जनप्रतिनिधि, प्रहरी हात्ती चढेर जंगल पुगेका थिए । बाघको आक्रमणबाट जीतपुरसिमरामा असार र भदौ महिनामा तीनजनाको मृत्यु भएको थियो । बाघको आक्रमणबाट जीतपुरसिमरा उपमहानगरपालिका १ का ६० वर्षीय छेवाङ्ग लामा, वडा नम्बर २२ का ५५ वर्षीय कृष्णप्रसाद शर्मा, वडा नम्बर २१ का ५० वर्षीय चन्द्रबहादुर ब्लोनको मृत्यु भएको थियो ।
बाघको आतंक नरोकिएपछि स्थानीयले बाघ नियन्त्रणमा लिन अनुरोध गर्दै आएका थिए ।
प्रतिक्रिया दिनुहोस !
