चितवन : सुक्खा पहिरो खसेका कारण नारायणगढ–मुग्लिन सडकखण्ड शुक्रबार साँझबाट अवरुद्ध छ । इच्छाकामना गाउँपालिका - ५ स्थित तुइन खोला नजिकै पहिरो जाँदा सडक अवरुद्ध भएको हो।
लगातार पहिरो खसेका कारण सफा गर्न नमिलेको जिल्ला प्रहरी कार्यालय चितवनका डिएसपी रविन्द्र खनालले बताए । बिहान साढे ६ बजेसम्म पनि ढुङगासहितको पहिरो खस्ने क्रम जारी छ । समय समयमा फाटफुट ढुङ्गाहरु झरिरहेको कारण पहिरो हटाउन कठिन भएको हो । पहिरो झर्ने क्रम रोकिए तीन वटा मेसिन प्रयोग गरेर पहिरो पन्छाउने तयारी गरिएको प्रहरीले जनाएको छ ।
राती ठूलो पहिरो खसेपछि पहिरो हटाउन समय लागेको हो । सवारीसाधनको जामका कारण काठमाडौं पोखरा रुटका साधन समेत प्रभावित भएका छन् ।
प्रहरीले सवारी चालकलाई लेन कायम गरेर बस्न माइकिङ गरेको छ । सडक अवरुद्ध भएपछि रातभर यात्रु अलपत्र परेका छन् । पहिरो खसेर दुई वटा इभी माइक्रोमा क्षति पुगेको छ । प्रदेश ०३–००१ ज ११६१ नम्बर र बागमती प्रदेश ०३–००१ ज ३१० नम्बरको माइक्रोमा सडक माथिबाट पहिरो खसेर सामान्य क्षति भएको छ ।
प्रतिक्रिया दिनुहोस !
