आजदेखि नवरात्री सुरू : पाल्पाका भगवती मन्दिरमा पुजापाठ गर्नेको भिडभाड

तानसेन : आज वडा दशैंको पहिलो दिन घटस्थापना।  पाल्पाका विभिन्न शक्तिपीठ तथा देवी भगवतीका मन्दिरमा भक्तजन‍‍को भिडभाड बढेको छ । भक्तजन बिहानैदेखि नदी तलाउ, धारा कुवामा स्नान गरी चोखो वस्त्र पहिरिएर पुजापाठ तथा देवीको दर्शनको लागि भगवती दुर्गाका मन्दिर पुगेका छन् । पाल्पालीहरूले शुभ साइतमा घरघर, देवीका मठ मन्दिरमा घटस्थापना गरेका छन् । 

जिल्लाको डाडा टाकुरामा रहेका भगवती दुर्गाका मन्दिर सरसफाई गरी आजदेखि देवीको नित्य पुजा आजा सुरू गरिएको छ । पाल्पामा अधिकांश देवी, भगवती, दुर्गाका मन्दिर, डाडाको टुप्पोमा निर्माण गरिएका छन् । 

नवदुर्गा सुरू भएपछि भगवती मन्दिरका वरिपरी भक्तजन भजन कृर्तन, दुर्गा तथा चण्डी पाठ गर्दै देवीको आराधनामा  जुटेका हुन् ।  तानसेनको भगवती मन्दिर परिसरमा परम्परागत नेवारी भाषाको डाफा भजनले संस्कृति जोगाएको छ ।  

लोपन्मुख अवस्थामा पुगेको नेवारी डाफा भजनलाई संरक्षणको लागि पाका पुस्तासँगै युवाहरू जोडिएका छन् । परम्परागत भजन संस्कृति बुढापाकामा मात्र रहेको अवस्थामा  युवालाई समेत डाफा भजनमा सहभागी गराएर तानसेनको पुरानो भजन संस्कृतिको जर्गेनाका लागि सहयोग पुगेको संस्कृतकर्मी राजेन्द्र गोपाल सिंहले बताए ।

भगवती मन्दिरमा तानसेन भजन संरक्षण समिति र भगवती भजन समूहले नियमितरुपमा नवदुर्गा समयभरी बिहानमा डाफा भजन गर्दै आएका भगवती मन्दिर गुठी व्यवस्थापन समितिका अध्यक्ष अशोक महर्जनले बताए ।  

तानसेनको भगवती मन्दिर, भैरवस्थानको भैरव मन्दिर, रम्भाको  रम्भादेवी मन्दिर,  दर्लाम महाकाली कन्दिर, बगनासकाली मन्दिर भुवनपोखरीको रैनादेवी मन्दिर, बतासेको कालिका मन्दिरलगायतका मन्दिरमा पुजा आजाका लागि भक्तजनको अध्याधिक भिड हुने गर्दछ ।  पाल्पामा नवदुर्गाको समयमा  मन्दिर वरिपरी विभिन्न समूहबाट सामूहिक देवी स्तुति भजन किर्तन गर्ने परम्परा रहेको छ।