परासी : नवलपरासीका दुई चिनी उद्योगले क्रसिङ सुरू गरेका छन् । उखु क्रसिङसँगै किसान यतिबेला उखु काट्न व्यस्त भएका छन् । जिल्लामा तीन चिनी उद्योग छन् । बागमती र लुम्बिनी चिनी उद्योग सञ्चालनमा आएका हुन् । प्रतापपुरस्थित इन्दिरा चिनी उद्योगका सञ्चालक नै सम्पर्कमा छैनन् । उक्त चिनी उद्योग सञ्चालन हुने संभावना देखिएको छैन ।
सुस्ताको कुडियास्थित बागमती चिनी उद्योग मंसिर २२ बाट सञ्चालनमा आएको छ । पुस २ गतेदेखि सञ्चालन हुने भनिएको सुनवलस्थित लुम्बिनी चिनी उद्योग आजबाट सञ्चालनमा आएको प्रबन्धक केशव आचार्यले जानकारी दिए ।
सञ्चालनमा रहेका चिनी उद्योगहरूले किसानबाट खरिद गरेको उखुको रकम केही दिनमै भुक्तानी गर्ने बताउँदै आएका छन् । बागमती चिनी उद्योगका प्रबन्धक टंक काफ्लले किसानलाई दुईदेखि सात दिनभित्र भुक्तानी दिने बताए । ‘गोदममा चिनी छ । बिक्री गर्दै भुक्तानी दिने व्यवस्था मिलाएका छौं,'काफ्लेले भने ।
उक्त उद्योगले मिल गेटसहित जिल्लाका विभिन्न ११ स्थानबाट उखु खरिदको व्यवस्था मिलाएको छ । त्यसैगरी लुम्बिनी चिनी उद्योगका प्रबन्धक केशव आचार्यले किसानबाट खरिद गरेको उखुको भुक्तानी धेरै दिन नरोक्ने बताए । 'अर्ली भेराइटीको उखुको भुक्तानी २/३ दिनमै दिन्छौं अरु उखुको हकमा १२/१५ दिन लाग्न सक्छ,' प्रबन्धक आचार्यले भने । उद्योगले मिल गेटसहित ५/६ स्थानबाट उखु खरिदको व्यवस्था गर्न लागेको उनले जानकारी दिए ।
पुरानो रकमसमेत भुक्तानी नदिएको इन्दिरा चिनी उद्योगका सञ्चालक भने सम्पर्कमा छैनन् । उद्योग सञ्चालनबारे जिज्ञासा राख्दा उद्योगमा कार्यरत लेखा शाखाका नाथु यादवले साहुहरु सम्पर्कमा नरहेकाले आफूले केही बताउन नसक्ने बताए । ‘मालिकहरू सम्पर्कमा छैनन् । चल्ने/नचल्ने थाहा छैन । म पनि घरमा बसेको छु । उद्योगमा सुरक्षा गार्डबाहेक कोही छैन्,'यादवले भने ।
जिल्लामा झन्डै १० हजार किसानले उखु खेती लगाउँदै आएका छन् । जिल्लामा गतवर्ष २३ लाख क्विन्टलभन्दा बढी उखु उत्पादन भएको सरकारी तथ्याङ्कले देखाएको छ । सरकारले गतवर्षको ३५ रुपैयाँ अनुदान उपलब्ध गराउने गरी कुल ८ करोड ३६ लाख ५७ हजार निकासा पठाएको कोष तथा लेखा नियन्त्रक कार्यालय(कोलेनिका) परासीका प्रमुख कोष नियन्त्रक कमल सापकोटाले जानकारी दिए ।
प्रतिक्रिया दिनुहोस !
