सिन्धुपाल्चोकमा ३ सय ३८ मतदान केन्द्र, २ लाख ७४ हजार ९ सय ९८ मतदाता

सिन्धुपाल्चोक : आगामी प्रतिनिधिसभा निर्वाचनको लागि सिन्धुपाल्चोकमा ३ सय ३८ मतदान केन्द्र कायम गरिएको छ। यहाँ २ लाख ७४ हजार ९ सय ९८ मतदाता रहेका छन्। जिल्लाभर १२ स्थानीय तहका १ सय ३ वडामा १ सय ४६ मतदान स्थलमार्फत ३ सय ३८ मतदान केन्द्रबाट मतदान गर्न पाउने व्यवस्था मिलाइएको जिल्ला निर्वाचन कार्यालय सिन्धुपाल्चोकका निर्वाचन अधिकारी राजेन्द्रप्रसाद प्याकुरेलले बताए । 

मतदाता विवरणअनुसार जिल्लामा महिला मतदाता १ लाख ३१ हजार ६ सय ९६ र पुरुष मतदाता १ लाख ४३ हजार ३ सय २ रहेका छन् । समग्रमा पुरुष मतदाता संख्या महिलाभन्दा ११ हजार ६ सय ६ ले बढी देखिएको छ ।

सिन्धुपाल्चोक दुई प्रतिनिधि सभा निर्वाचन क्षेत्रमा विभाजित छ । प्रतिनिधि सभा क्षेत्र नं १ अन्तर्गत त्रिपुरासुन्दरी,भोटेकोशी, लिसंखुपाखर, बाह्रबिसे, जुगल, बलेफी र सुनकोशी गाउँपालिका साथै चौतारा साँगाचोकगढी नगरपालिकाका २, ३, ४, ९ र १० नं. वडा पर्दछन् । यस क्षेत्रमा ८३ मतदान स्थल र १ सय ७२ मतदान केन्द्र रहेका छन् । क्षेत्र नं १ मा महिला मतदाता ६५ हजार ७ सय २३ र पुरुष मतदाता ७१ हजार २ सय ६२ गरी कुल १ लाख ३६ हजार ९ सय ८५ मतदाता रहेका छन् ।

यस्तै, प्रतिनिधि सभा क्षेत्र नं २ मा चौतारा साँगाचोकगढी नगरपालिकाका १, ५, ६, ७, ८, ११, १२, १३ र १४ नं. वडा, मेलम्ची नगरपालिका, इन्द्रावती, पाँचपोखरी थाङ्पाल र हेलम्बु गाउँपालिका समेटिएका छन् । यस क्षेत्रमा ६३ मतदान स्थल र १ सय ६६ मतदान केन्द्र रहेका छन् । क्षेत्र नं २ मा महिला मतदाता ६५ हजार ९ सय ७३ र पुरुष मतदाता ७२ हजार ४० गरी कुल मतदाता संख्या १ लाख ३८ हजार १३ पुगेको छ ।

दुबै क्षेत्रको तुलनामा प्रतिनिधि सभा क्षेत्र नं २ मा क्षेत्र नं १ भन्दा १ हजार २८ मतदाता बढी रहेका छन् । स्थानीय तह, मतदान केन्द्र र मतदाता संख्याको वितरण आगामी निर्वाचन व्यवस्थापन, सुरक्षा समन्वय र मतदाता सहभागिता बढाउने तयारीका लागि महत्वपूर्ण आधारका रूपमा हेरिएको निर्वाचन अधिकारी प्याकुरेलले बताए ।

जिल्लामा मतदान स्थल व्यवस्थापन, मतदाता पहुँच, ज्येष्ठ नागरिक तथा अपांगता भएका मतदातालाई सहजीकरण गर्ने विषयलाई समेत ध्यानमा राखेर तयारी अघि बढाइएको निर्वाचन कार्यालयले जनाएको छ ।