तस्करका अनेक तरिका : ध्यू देखाएर चरेस बिक्री, दुईजना प्रहरीको फन्दा

वीरगन्ज  :  ध्यूको ग्यालेनभित्र चरेस लुकाएर भारत तस्करी गर्ने दुईजना पर्सामा पक्राउ परेका छन् । पक्राउ पर्नेमा पर्साको वीरगन्ज महानगरपालिका वडा नम्बर १५ मुर्ली घर भएका २० वर्षीय रैयस अली र पोखरिया नगरपालिका वडा नम्बर.८ जगतपुर घर भएका ५५ वर्षीय  मुनिलाल पटेल रहेका छन् ।

पर्साको बिन्दबासिनी गाउँपालिका वडा नम्बर २ गर्दौल चोकभन्दा पूर्व पोखरिया जाने सडकबाट ती दुवैजनालाई प्रहरीले लागूऔषध चरेस २२ केजीसहित पक्राउ गरेको हो ।

विशेष सूचनाको आधारमा बिहीबार बिहान इलाका प्रहरी कार्यालय पोखरियाबाट खटिएको प्रहरी टोलीले गर्दौ चोकको सडकमा २ वटा कालो झोला बोकेर जाँदै गरेका अली र पटे्ललाई रोकेर चेकजाँच गरेको थियो । 

त्यसक्रममा ती दुवै जनाले बोकेको कालो झोला भित्र राखिएको पानी खाने १० लिटरको ग्यालनको बिर्को खोलेर हेर्दा उक्त ग्यालनको मुखमा ध्यू रहेको र ध्यूमुनि चरेस लुकाएर राखिएको अवस्थामा भेटिएको थियो । 

अलीले बोकेको ग्यालेनबाट १० किलो ६०० ग्राम र पटेलले बोकेको ग्यालेनबाट ११ किलो ४०० ग्राम चरेस बरामद भएको प्रहरी नायब उपरीक्षक राजु कार्कीले जानकारी दिए ।  चरेससहित नियन्त्रणमा लिइएका अली र पटेललाई प्रहरी हिरासतमा राखेर थप अनुसन्धान भइरहेको कार्कीले बताए ।