मेहनत र अनुशासन नै विद्यार्थीको गहना : कप्तान एन्जिला तुम्बापो

काभ्रे : राष्ट्रिय फुटबल टोलीको अप्तान एन्जिला तुम्बोपो सुब्बाले विद्यार्थीहरुलाई अनुशासनमा बस्न सुझाव दिएकी छिन् । काभ्रेको बनेपास्थित प्रगति प्रभात स्कुल पुगेकी कप्तान तुम्बापोले मेहनत र अनुशासन नै विद्यार्थीको गहना भएको बताएकी छिन् । 

प्रगति प्रभात एकेडेमी सेकेण्डरी विद्यालयमा खेलकुद मिट–२०८२ सुरुवात गर्दै  नेपाली राष्ट्रिय महिला टोलीकी कप्तान एवं गोलकिपर एन्जिला सुब्बाले आफूले संघर्षबाट धेरै कुरा सिकेको अनुभव सुनाइन् । परिवारको सहयोग, अग्रजको मार्गनिर्देशन र कडा मेहनतले सफलताको उचाइमा पु¥याउने उनले बताइन् । जीवनमा सफलता हात पार्न सबैभन्दा ठूलो कुरा अनुशासन र दृढ संकल्प हुनुपर्नेमा उनले जोड दिइन् । 

उनले भिन्, ‘जीन्दगीमा उतारचढाव आइ नै रहन्छन्, दुःखको बेला नआत्तिनु, अनुशासनमा रहनुहोला, सफलता अवश्य नै मिल्ने छ ।’ कार्यक्रममा विद्यालयकी प्रिन्सिपल सुमित्रा श्रेष्ठले विद्यार्थीलाई संघर्ष, लगनशिलता र मेहनतको महत्वबारे वुझाउन खेलकुद प्रतियोगिता आयोजना गरिएको बताइन् । खेल हार–जित मात्रै नभई अनुशासन, धैर्यता, संघर्ष र सहकार्यको महत्वपूर्ण सम्मिश्रण रहेको उनले बताइन् ।

शुक्रबारबाट सुरु भएको खेलकुद सप्ताह २९ गतेसम्म सञ्चालन हुने व्यवस्थापकीय निर्देशक तेजप्रसाद ताजपुरीयाले जानकारी दिए । प्याब्सन काभ्रेका अध्यक्ष श्याम भुजेलले संघर्षबाट खारिएको व्यक्ति हरेक ठाउँमा सफल हुने कुरामा जोड दिए । खेलकुदले स्वस्थ शरीर, सक्षम नागरिक उत्पादन गर्न सघाउने बताए । खेलकुद सप्ताहमा विभिन्न खेलहरूमा प्रतिष्पर्धा हुने जनाएको छ ।