बंगलादेश : गत साता सम्पन्न बंगलादेशको ऐतिहासिक निर्वाचन २०२४ मा जेन–जेड नेतृत्वको जनआन्दोलनपछि गरिएको थियो । तर उक्त आन्दोलनबाट जन्मिएको युवा प्रधान राष्ट्रिय नागरिक पार्टी (एनसीपी) ले २९७ मध्ये केवल ६ संसदीय सिट मात्र जित्न सफल भयो ।
शनिबार घोषणा गरिएको आधिकारिक नतिजाअनुसार मतदाताहरूले लामो समयदेखि स्थापित बंगलादेश नेशनलिस्ट पार्टी (बीएनपी) लाई स्पष्ट समर्थन दिएका छन् । बीएनपीले जमात–ए–इस्लामी नेतृत्वको गठबन्धनलाई पराजित गर्यो, जसमा एनसीपी प्रमुख साझेदार थियो ।
बीएनपीका नेता तारिक रहमान, जसको पार्टीले यसअघि तीन पटक शासन गरिसकेको छ (सबैभन्दा पछिल्लो २००१–२००६), देशको इतिहासकै महत्वपूर्ण निर्वाचनपछि प्रधानमन्त्री बन्ने तयारीमा छन् । पहिलो पटक मतदान गरेका धेरै युवा बंगलादेशीहरूले निर्वाचनलाई ऐतिहासिक भने पनि परिणाम आफ्ना अपेक्षाअनुसार नभएको बताएका छन् ।
विद्यार्थी अफसाना होसैन हिमिले भनिन्, ‘हामी जेन–जेड पुस्ताले यति धेरै बलिदान दिए पनि अपेक्षित प्रतिनिधित्व पाएनौं । तर पनि हामी धेरै आशावादी छौं । हाम्रो पुस्ताका प्रतिनिधि छन् र हामी आशा गर्छौ उनीहरूले राम्रो काम गर्नेछन् ।’ धेरै युवाहरूको धारणा थियो कि एनसीपीले निर्वाचनअघि पर्याप्त समर्थन आधार तयार गर्न सकेन ।
२३ वर्षीय विद्यार्थी सोहानुर रहमानले भने, ‘२०२४ को आन्दोलनपछि जनताले राखेको आशा र सपना अनुसार एनसीपी अघि बढ्न सकेन । जमातसँगको सहकार्यले हामी जस्ता धेरै युवालाई निराश बनायो, त्यसैले हामीले समर्थन गरेनौं ।’ एनसीपीका प्रवक्ता आसिफ महमुदले पार्टीले प्रतिपक्षमा बसेर पुनर्गठन गर्ने र आगामी वर्ष हुने स्थानीय तहको निर्वाचनमा ध्यान केन्द्रित गर्ने बताएका छन् ।
‘नयाँ सुरुवात’
१७ करोड बढी जनसंख्या भएको बंगलादेशमा विश्वकै सबैभन्दा युवा जनसंख्यामध्ये एक रहेको छ । करिब ४४ प्रतिशत मतदाता (५६ मिलियन) १८ देखि ३७ वर्ष उमेर समूहका छन् । निर्वाचनको नतिजालाई २०२४ को आन्दोलनपछि उत्पन्न राजनीतिक अस्थिरतापछि स्थायित्व फर्काउने अवसरका रूपमा हेरिएको छ । उक्त आन्दोलनले तत्कालीन प्रधानमन्त्री शेख हसिनालाई सत्ताबाट हटाएको थियो । संयुक्त राष्ट्रसंघका अनुसार सुरक्षाकर्मीहरूले १,४०० भन्दा बढी मानिसको हत्या गरेका थिए । हसिना हाल नयाँ दिल्लीमा निर्वासनमा बसिरहेकी छन् र दमनको आरोपमा अनुपस्थितिमै मृत्युदण्ड सुनाइएको छ ।
तारिक रहमानले शान्ति, व्यवस्था र विधिको शासनलाई प्राथमिकता दिने प्रतिबद्धता जनाएका छन् । उनले भने, ‘कुनै पनि अवैध गतिविधि सह्य हुने छैन । शक्तिशालीले कमजोरमाथि आक्रमण गर्ने कुरा स्वीकार्य हुने छैन । न्याय नै हाम्रो मार्गदर्शक सिद्धान्त हुनेछ ।’
जहाँगीरनगर विश्वविद्यालयका एक प्राध्यापकका अनुसार जमात–एनसीपी गठबन्धनले नयाँ राजनीतिक वर्गको अपेक्षा गरेका युवालाई टाढा बनायो र यसले बीएनपीलाई बलियो बनायो । तर विद्यार्थी फरहान उल्लाशका लागि भने यो निर्वाचन विगतबाट छुटकारा पाउने अवसर जस्तै थियो । ‘यो निर्वाचन हाम्रो लागि सपना जस्तै थियो, बंगलादेशका लागि नयाँ सुरुवात । आशा छ, नयाँ सरकारले हाम्रो आवाज सुन्नेछ’, उनले भने ।
प्रतिक्रिया दिनुहोस !
