मेक्सिको : मेक्सिकोमा देशका सबैभन्दा खोजिएका लागुऔषध तस्करको मृत्यु भएपछि हिंसा फैलिएको छ । नेमेसियो ओसेगेरा सेर्भान्तेस, जसलाई ‘एल मेन्चो’ भनेर चिनिन्थ्यो, Jalisco New Generation Cartel -CJNG_ का नेता थिए। आइतबार जालिस्को राज्यको तापाल्पा शहरमा उनलाई पक्राउ गर्न गरिएको सैन्य कारबाहीका क्रममा उनका समर्थक र सेनाबीच झडप हुँदा गम्भीर घाइते भएका उनी पछि मृत्यु भएको बताइएको छ ।
मेक्सिकोको रक्षा मन्त्रालयका अनुसार उक्त कारबाहीमा CJNG का चार सदस्य मारिएका छन् भने तीन जना सैनिक घाइते भएका छन्। एल मेन्चोको मृत्युको प्रतिशोधस्वरूप हिंसा कम्तीमा एक दर्जन राज्यहरूमा फैलिएको छ । CJNG ले विभिन्न स्थानमा सवारी साधन जलाएर सडक अवरुद्ध गरेको छ । जालिस्को तथा अन्य स्थानहरूमा बन्दुकधारीहरू सडकमा देखिएको प्रत्यक्षदर्शीहरूले बताएका छन् ।
ग्वाडालाहारा लगायतका सहरहरूमा धुवाँको मुस्लो उठिरहेको भिडियोहरू सार्वजनिक भएका छन् । ग्वाडालाहारा आगामी फिफा वर्ल्डकप आयोजक सहरमध्ये एक हो । जालिस्कोका गभर्नर पाब्लो लेमुस नाभारोले राज्यमा ‘कोड रेड’ घोषणा गर्दै सार्वजनिक यातायात स्थगित गरेका छन् भने सार्वजनिक कार्यक्रम र प्रत्यक्ष कक्षाहरू रद्द गरिएका छन् ।
रिसोर्ट सहर पुएर्तो भायार्टामा रहेका पर्यटकहरूले समाचार संस्था रोयटर्ससँग कुरा गर्दै उक्त स्थानलाई ‘युद्ध क्षेत्र’ जस्तै भएको बताएका छन् । अमेरिकी समाचार साझेदार सीबीएसका अनुसार अशान्तिका क्रममा देशभर करिब २५० सडक अवरोध गरिएका थिए, जसमध्ये ६५ जालिस्कोमा मात्र थिए । पछिल्लो अद्यावधिकमा मेक्सिकोको सुरक्षा क्याबिनेटले जालिस्कोमा चार अवरोध अझै सक्रिय रहेको जनाएको छ ।
क्याबिनेटका अनुसार २५ जना पक्राउ परेका छन् । ११ जनालाई हिंसात्मक गतिविधिमा संलग्न भएको आरोपमा र अन्य १४ जनालाई लुटपाट तथा तोडफोडमा संलग्न भएको आरोपमा पक्राउ गरिएको हो । हिंसाका क्रममा पसलहरूमा आगजनी भएको छ भने करिब २० वटा बैंक शाखामाथि आक्रमण गरिएको बताइएको छ ।
मेक्सिकी राष्ट्रपति Claudia Sheinbaum ले राज्य र संघीय निकायबीच ‘पूर्ण समन्वय’ रहेको बताउँदै नागरिकहरूलाई ‘शान्त र सूचित’ रहन आग्रह गरेकी छन् । उनले देशका अधिकांश भागमा गतिविधि सामान्य रूपमा सञ्चालन भइरहेको पनि बताइन् । कयौं विमान कम्पनीहरूले जालिस्कोका लागि उडान रद्द गरेका छन्, जसमा एयर क्यानडा, युनाइटेड एयरलाइन्स र अमेरिका एयरलाइन्स समावेश छन् ।
अमेरिकाले आफ्ना नागरिकहरूलाई जालिस्को, तामाउलिपास, मिचोआकानका केही क्षेत्र, गुएरेरो र नुएभो लियोनमा सुरक्षित स्थानमा बस्न चेतावनी दिएको छ । बेलायत सरकारले पनि जालिस्कोमा ‘गम्भीर सुरक्षा घटना’ भएको भन्दै त्यहाँ रहेका आगन्तुकहरूलाई अत्यधिक सतर्कता अपनाउन र स्थानीय निकायको सल्लाह पालना गर्न आग्रह गरेको छ ।
एल मेन्चोलाई पक्राउ गर्न गरिएको कारबाहीमा अमेरिकाले मेक्सिकोलाई गुप्तचर सूचना उपलब्ध गराएको थियो । अमेरिकी प्रेस सचिव क्यारोलिन लेभिटले एल मेन्चो अमेरिकामा फेन्टानिल तस्करी गर्ने प्रमुख अपराधीमध्ये एक रहेको बताएकी छन् । ५९ वर्षीय पूर्व प्रहरी अधिकारी एल मेन्चोले कोकेन, मेथाम्फेटामिन र फेन्टानिलको ठूलो परिमाण अमेरिकातर्फ तस्करी गर्ने विशाल आपराधिक सञ्जाल सञ्चालन गर्दै आएका थिए । युनाइटेड स्टेट डिपार्टमेन्ट या स्टेजले उनको पक्राउका लागि सूचना दिने व्यक्तिलाई १५ मिलियन डलर पुरस्कार घोषणा गरेको थियो ।
मेक्सिकोको रक्षा मन्त्रालयले उक्त कारबाही देशका विशेष बलद्वारा ‘योजना बनाई कार्यान्वयन’ गरिएको जनाएको छ । अमेरिकी लागुऔषध नियन्त्रण प्रशासनका पूर्व अन्तर्राष्ट्रिय सञ्चालन प्रमुख माइक भिजिलले यस कारबाहीलाई लागुऔषध तस्करीको इतिहासमा ‘सबैभन्दा महत्वपूर्ण कदमहरूमध्ये एक’ भनेका छन् ।
प्रतिक्रिया दिनुहोस !
